Муус устар 23 күннээҕи туругунан, өрөспүүбүлүкэ үрдүнэн 7 936 туонна үүт туттарылынна. Оттон былырыын баччаларга 7 016 туонна соҕотуопкаламмыта.
edersaas.ru
Быйыл барыта 80 706 туонна үүт соҕотуопкаланыахтаах. АПК тэрилтэлэрэ, ынах сүөһүнү иитэр хаһаайыстыбалар уонна соҕотуопкалыыр-астыыр кэпэрэтииптэр, коронавируһунан сибээстээн хааччахтыыр дьаһаллары, санитарнай ирдэбиллэри тутуһаннар, тустаах үлэлэрин толоро олороллор. Изоляцияланыы, харантыын эрэсиимигэр олорор дьоннорун-сэргэлэрин сибиэһэй үрүҥ аһынан хааччыйаллар, сүөһү иитээччилэри дохуоттууллар.
– Чурапчы, Бүлүү, Өлүөхүмэ, Кэбээйи, Ленскэй, Хаҥалас улуустара уонна Дьокускай куорат бастакы кыбаарталлааҕы былааннарын аһары толордулар, – диир тыа хаһаайыстыбатын министиэристибэтин астыыр-таҥастыыр департаменын сүрүн исписэлииһэ Веронида Егорова. – Сыллааҕы былааны биирдиилээн улуустарынан ыллахха, Мэҥэ Хаҥалас 8 500, Чурапчы 7 600, Сунтаар 7 500, Хаҥалас 6 400, Амма 5 800, Бүлүү 5 700, Ньурба 5 300 туонна үүтү тутан астыыр сорудахтаахтар. Саҕалааһын куһаҕана суох.
Быйылгы 2020 сылга сүөһүттэн ылыллар бородууксуйаны оҥорууга уонна астааһыҥҥа, ол иһигэр, үүт соҕотуопкатыгар, көрүллүбүт 2 800 000 тыһ. солк. субвенция 70 %-на (1 960 000 тыһ.) өссө бастакы кыбаарталга улуустарга тиэрдиллибит.
Раиса Сибирякова, «Саха сирэ» хаһыат, edersaas.ru