Юрист сүбэтэ: гааһы дьиэҕэ босхо киллэрии

Бөлөххө киир:

Александра Владимировна Копцева – чааһынай юрист. Дьиэ-уот, сир боппуруостарыгар идэтийэр. Ону тэҥэ, дьиэ кэргэн, нолуок, үлэ боппуруостарынан дьарыктанар, туһанааччылар бырааптарын көмүскүүр.

Ааспыт ыйга гааһы дьиэҕэ босхо киллэрии туһунан саҥа быраабылалар ылыллыбыттара.

Догазификация” — гааһы тарҕатар ситимтэн дьиэлээх учаастакка диэри гааһы тиэрдии. Саҥа быраабыла быһыытынан, дьиэҕэ тиэрдии билигин босхо буолла. Урут дьиэлээх киһи бэйэтэ киллэртэрэр этэ, ороскуота 400 тыһыынча солкуобайга диэри тиийэрэ.

Гааһы босхо киллэрии чааһынай киһи, ыал туһанарыгар эрэ оҥоһуллар. Кэмиэрчэскэй сыаллаах (маҕаһыыннарга, тэрилтэлэргэ, о.д.а.) буоллаҕына, босхо киллэрии суох. Учаастакка олорор дьиэ хайаан да баар буолуохтаах.

Гааһы босхо киллэртэрэр туһуттан, тустаах тэрилтэ саайтыгар киирэн, сайаапка биэриэххэ наада. Маннык докумуоннар ирдэнэллэр:

— ситуационнай былаан;

— 1:500 масштабтаах топосъемка;

— учаастак уонна дьиэ докумуоннара;

— сорох түгэҥҥэ – гаас чааһынан ороскуоттаныытын суоттааһын уонна сир былаанын докумуонун куоппуйата.

Салгыы гааһы холбооһун туһунан дуогабар түһэрсиллэр. Сиһилии РФ бырабыыталыстыбатын 2021 сыл балаҕан ыйын 13 күнүнээҕи 1547 №-дээх ыйааҕын кытта билсиэххитин сөп.

Ону тэҥэ, гаас тэрилтэлэрэ дьону барытын гааһынан хааччыйар эбээһинэстэнэллэрин туһунан сокуон таҕыста. Ол эбэтэр, гаас ситимэ мөлтөҕүнэн сибээстээн, гааһы киллэрэри аккаастаатахтарына, ол сокуоун кэһии буолар, аны тэрилтэ гаас ситимин кыаҕын улаатыннарар эбээһинэстэнэр. Ол туһунан “О газоснабжении РФ” федеральнай сокуон 27-с ыстатыйатыгар уларыйыылар киирдилэр. Урут ити биричиинэнэн үгүс дьоҥҥо аккаастыыр этилэр. Сороҕор гаас ситимин кыаҕа тиийбэт буолар, ону учаастагы атыылаһарга бэрэбиэркэлиэххэ наада. Билигин ити кыһалҕа судургутуйда.

Ангелина Васильева, «Саха сирэ» хаһыат, edersaas.ru

Хаартыскаҕа: ria.ru

+1
0
+1
0
+1
0
+1
0
+1
0
+1
0
+1
0