Юрист сүбэтэ: Нэһилиэстибэнэн тиксэр сааны хайдах ылабын?

Ааптар: 
Бөлөххө киир:

edersaas.ru сайтка «Юрист сүбэтэ» рубриканы арыйабыт. Манна юрист Лиза Эверстова дьон мунаахсыйар боппуруостарыгар, тиэмэлэригэр сөптөөх хоруйу биэриэҕэ. 

Олоххо араас буолар. Ол курдук, чугас дьонуҥ олохтон туоруур түгэнигэр юридическай өттүнэн киһи тугу билиэхтээҕий уонна тугунан салайтарыахтааҕый?

Бастатан туран, нэһилиэстибэни өлбүт киһи кэргэнэ, оҕолоро ылыахтаахтар. Гражданскай кодексаҕа этиллэринэн, онуоха алта ый бэриллэр. Ол болдьоҕу куоттардаххына, нэһилиэстибэни суут эрэ нөҥүө ылар кыахтанаҕын. Нэһилиэстибэни ылар туһугар нотариуска сайабылыанньа суруйуохтааххын. Оччоҕо кини докумуоннары бэрэбиэркэлээн баран, нэһилиэстибэни арыйар.

Гражданскай кодекса 1180-с ыстатыйатыгар этиллэринэн, саа син биир атын баай-дуол курдук бэриллэр. Ол гынан баран, “Саа туһунан сокуоҥҥа” сурулларынан, нэһилиэстибэ испииһэгин иһигэр саа баар буоллаҕына, нэһилиэстибэни ылааччы киһи саалары полицияҕа туттарарга усулуобуйа оҥоруохтаах. Сааны полициялар бэйэлэрэ кэлэн ылыахтаахтар, онно икки боротокуол оҥоһуллуохтаах, биирэ нэһилиэстибэни ылааччы (наследник) киһиэхэ бэриллиэхтээх. Нэһилиэстибэни ылааччы киһи бэйэтэ тиийэн туттарыа суохтаах, тоҕо диэтэххэ кини сааны тутар уонна туһанар сөбүлэҥэ суох буолар. Саа полицияларга нэһилиэстибэ докумуона оҥоһуллуор диэри сытар.

Нэһилиэстибэни ылар туһугар нэһилиэстибэни ылааччы нотариуска тиийиэхтээх уонна сайыбылыанньа суруйуохтаах. Нотариус нэһилиэстибэ дьыалатын арыйар (наследственное дело) уонна бэрэбиэркэлиир. Алта ый ааспытын кэниттэн нэһилиэстибэ ылааччыга сибидиэтэлистибэни биэрэр. Нэһилиэстибэни ылааччы ол докумуону полицияларга илдьэн биэрэр. Сааны регистрациялыырга лицензия баар буолуохтаах. Аны туран, саалар араас буолаллар, нууччалыы эттэххэ, гладкоствольнай (дробь) уонна нарезной (буулдьа саа). Дробь сааны ыларга лицензия алта ый болдьохтоох. Буулдьа сааны биэс эрэ сылынан ылаллар. Полицияларга саа биир сыл устата хараллан сытар. Аны сааны нэһилиэстибэ быһыытынан ыларга сыаналатыахха (оценкалатыахха) наада.

Онон, күндү аа5ааччылар, бэйэҕит быраапкытын билиҥ уонна сокуону кэһимэҥ.

Лиза Эверстова, edersaas.ru

+1
0
+1
0
+1
0
+1
0
+1
0
+1
0
+1
0