РФ президенин Уһук Илин регионнарга боломуочуйалаах бэрэстэбиитэлэ, вице-премьер Юрий Трутнев бэҕэһээҥҥиттэн Саха сиригэр үлэлиир. Бүгүн историческэй паарка аһыллыытыгар сылдьан баран, өрөспүүбүлүкэ 2025 сылга диэри сайдыытын боппуруостарыгар улахан мунньаҕы ыытта.
edersaas.ru.
Мунньах саҕаланыыта кини РФ президенин дьаһалларын толорууга, бастакы уочарат, Уһук Илин регионнар экономикаларын сайыннарыыга болҕомто ууруллубутун, ол чэрчитинэн, Саха сиригэр икки урутаан сайдар сир – “Соҕуруу Саха сирэ” уонна “Хаҥалас” индустриальнай паарка, тутуллубуттарын иһитиннэрдэ. “Мин санаабар, бастаан экономика боппуруостарын быһаарыыга ылсыбыппыт сөп. Тоҕо диэтэргин бастакы уочарат үбүлээһини быһааран баран, ону ханна ороскуоттуурбутун көрүөххэ наада этэ. Билигин 14 резидент үлэлиир, 30 млрд солк. инвестиция киирдэ. Аны билигин иккис түһүмэҕи, социальнай сайдыыны, кэпсэтиэхпитин наада”, – диэн этэр Юрий Петрович.
Манна сыһыаран вице-премьер 2025 сылга диэри Уһук Илин регионнарга киһи олорор усулуобуйата биллэ тупсуохтааҕын, ханна бырайыак баар да, онно дьон олорор усулуобуйатын тупсарыы барыахтааҕын, ол иһигэр олорор дьиэ, оскуола, оҕо саада, балыыһа тутуллуохтаахтарын иһитиннэрдэ. Ону таһынан дьон-сэргэ сир ылан олохсуйуон баҕалаах сирдэригэр инфраструктураны оҥоруу барыахтааҕын эттэ. “Кинилэри өйүөххэ уонна наадалаах инфраструктуранан хааччыйыахха”, – диэн бэлиэтиир.
Юрий Петрович этиитигэр эбэн, Амма улууһун олохтоохторо Уһук Илин регионнарга бэриллэр биир гектар сокуонун туһанан, Булуҥ диэн 90-с сыллардаахха эстэн хаалбыт бөһүөлэги чөлүгэр түһэрэргэ ылсыбыттарын этэн аһарар тоҕоостоох. Билигин манна 54 киһи учаастак ылан олорор. Кинилэр тыа хаһаайыстыбатынан дьарыктанар санаалаахтар. Итиннэ бөһүөлэк сирэ-уота толору эппиэттиир.
Аграфена КУЗЬМИНА, “Саха сирэ” хаһыат, edersaas.ru.