Юрий Трутнев уонна Айсен Николаев Өлөөн оройуонугар хоту дойду олохтоохторун үгэс буолбут бырааһынньыктарыгар кытыннылар
Өлөөн улууһугар Табаһыт күнэ ыытылынна. Таба сүүрдүүтэ, үгэс буолбут үҥкүү, национальнай таҥас эгэлгэтэ, сыыдамнар, сымсалар күрэхтэһиилэрэ бу күнү киэргэттилэр. Табаһыт династиялар Павловтар Саха сирин баһылыгын Гранын ыллылар.
Өлөөн национальнай эбэҥки оройуонун олохтоохторун сааһы уруйдаан, үөрүүлэрин-көтүүлэрин Арассыыйа бырабыыталыстыбатын бэрэссэдээтэлин солбуйааччы – Арассыыйа бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев, Саха сирин Ил Дархана Айсен Николаев, Арктиканы сайыннарыыга уонна СӨ Хоту дойду норуоттарын дьыалаларыгар миниистирэ Александр Саввинов, өрөспүүбүлүкэ норуодунай дьокутаата Елена Голомарева, “АЛРОСА” АК генеральнай дириэктэрин солбуйааччы Алексей Дьячковскай, “Анаабыр алмаастара” АУо генеральнай дириэктэрэ Павел Маринычев, “ВостокИнжиниринг” ХЭТ генеральнай дириэктэрэ Сергей Сергиенко уо.д.а. үллэһиннилэр.
Бырааһынньык оройуон нэһилиэктэрин бэрэстэбиитэллэрин, таба иитэр хаһаайыстыбаларын уонна династияларын, улуус тэрилтэлэрин сэлэлээн хаамыыларынан саҕаланна. Тыйаатыраалынай туруорууга төрүт үгэһин илдьэ сылдьар эбэҥки норуота дьоруой быһыытынан көрдөрүлүннэ.
Бырааһынньык үөрүүлээх чааһын кэмигэр Айсен Николаев Саха Өрөспүүбүлүкэтин Ил Дарханын 400 тыһыынча солкуобай кээмэйдээх Гранын Дьилиҥдэттэн Павловтар дьиэ кэргэн табаһыт династияларыгар туттарда.
Юрий Трутнев Хоту дойду аҕыйах ахсааннаах төрүт норуоттарын уонна бырамыысыланнас сир баайын хостуур хампаанньаларын доҕордуу сыһыаннарын көрөн астыммытын бэлиэтээтэ. Боломуочуйалаах бэрэстэбиитэл сир баайын туһанааччылар регион экологическай уратытытн эрэ буолбакка, өбүгэ саҕаттан төрүт үгэстэрин болҕомтоҕо ылыахтаахтарын бэлиэтээтэ.
“Табаһыт күнүн” бырааһынньыга олус сэргэх: сыарҕанан уонна табаны миинэн сүүрдүү, национальнай таҥаһы көрдөрүү, муус скульптура куонкуруһа, төрүт үҥкүү, спорка күрэхтэһиилэр, маамыктаны быраҕыы, наартаны ойуу, эбэҥки аатырбыт футбола, быыстапка-дьаарбаҥка уо.д.а.
Өлөөн өрүс устун 10 км табалар сүүрүүлэрэ бырааһынньык саамай күүтүүлээх түгэнинэн буолла. Сүүрдүү кыайыылааҕа мөлүйүөн солкуобай суумалаах супер-бирииһи тутта. Атын түһүмэхтэргэ 4 “Буран” снегоход оонньонно диэн СИА-ҕа Саха сирин Ил Дарханын уонна бырабыыталыстыбатын пресс-сулууспата иһитиннэрдэ.
СИА.