Юрий Трутнев уонна Айсен Николаев «Күчүс» көмүстээх сир уонна гаас бырайыагын тула мунньахтаатылар

Ааптар: Эдэр Саас

Бөлөххө киир:

Бүгүн, сэтинньи 18 күнүгэр, РФ Бырабыыталыстыбатын Бэрэссэдэтээлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Саха сиригэр инвестбырайыактар олоххо киириилэринэн мунньаҕы ыытта. Манна «Күчүс» Усуйаана Дьааҥылыын быысаһыытыгар баар көмүстээх сир, «Якутский газовый проект» тула инвестиционнай бырайыактар олоххо киириилэрин ырыттылар.

«Биһиги Уһук Илин, чуолаан Саха сирэ сайдыытыгар үлэбитин салгыыбыт. Өрөспүүбүлүкэ сиригэр-уотугар билигин судаарыстыба өйөбүлүнэн 54 инвестиционнай бырайыак үлэлиир. Олор истэригэр Инаглинскай, Денисовскай сир баайдаах баазаларга хайаны байытан кэмбинээттэри тутуу, Үөһээ Муунаҕа алмаас хостуур тэрилтэни оҥоруу. 25 бырайыак үлэлээн саҕалаабыта, өссө 29 олоххо киирээри турар. Инвестордар 130 миллиард солкуобайы көрдүлэр, 10 тыһыынчаттан тахса үлэ миэстэтэ тэрилиннэ. Бүгүн биһиги «Күчүс» көмүстээх сир уонна гаас бырайыагын тула кэпсэтиэхпит», —диэн мунньах бэбиэскэтин Юрий Трутнев иһитиннэрдэ.

Ил Дархан Айсен Николаев этэринэн, «Күчүс» көмүстээх сири баһылыырга инфраструктураны тэрийии сүрүн боппуруоһунан буолар. Бу сир өрөспүүбүлүкэҕэ көмүһүн саппааһынан иккис миэстэни ылар. Усуйаана уонна Дьааҥы улуустарын быысаһыытыгар баар. Онон Саха сирин Арктикатын зонатыгар баар хайаттан хостуур салааҕа саамай улахан инвестбырайыак буолар.

«Барыллаан сыаналааһынынан, «Күчүстэн» сылга 10 туонна кыһыл көмүһү хостуур былаан баар. Манна эбии кыһыл көмүһү Мастаахтан, Дьахтарскайтан хорҕолдьуну, Кулартан бороҥ чоҕу хостуур кыах баар. 10 туоннаттан итэҕэһэ суох потенциальнай саппаастаах көмүс хостуур кыра сирдэри кыттыһыннарар кыах баарын көрөбүт. Бу эрэгийиэннэргэ көмүһү хостооһуҥҥа Саха сирэ ТОП-3 позициятын тута сылдьарын бөҕөргөтүө, саҥа үлэ миэстэтэ тахсыа, өрөспүүбүлүкэ бүддьүөтүгэр нолуок киириитэ улаатыа», — диэн Айсен Николаев эттэ.

Өссө биир сүрүн хайысха — ЯТЭК гаастаах бырайыагын сайыннарыы. Бу бырайыак чэрчитинэн Кыһыл Сыыртан Хабаровскай кыраай Аян бөһүөлэгэр диэри 1400 км усталаах магистральнай газопровод тутуллара, сылга 18 мөлүйүөн туоннаҕа тиийэ айылҕа гааһын таһаарар былааннанар. Бу олоххо киирдэҕинэ Мэҥэ Хаҥалас, Амма, Уус Майа улуустарын 16 тыһыынча киһи нэһилиэнньэлээх 14 нэһилиэгэ гааска холбонуоҕа.

Ил Дархан уонна Бырабыыталыстыба дьаһалтатын пресс-сулууспата.

Андрей Сорокин хаартыската.