Юрий Трутнев уонна Айсен Николаев Дьааҥы олохтоохторун кытта көрүстүлэр
Санатан суруйдахха, Дьааҥыга өрүс уута туолан 210 тиэргэн, 120 дьиэ, 69 элбэх кыбартыыралаах дьиэ ууга барбыта. Бүгүҥҥү күҥҥэ уу түспүтэ, дьиэлэри куурдуу, сууйуу-сотуу үлэтэ бара турар. Уу таһыма муҥутаан 1092 см тиийэ сылдьыбыта (кутталлаах кирбии — 1020 см). Олохтоохтор биир кэмнээх көмөҕө сайаапка биэрэллэр. Киһи олорбот гына эмсэҕэлээбит дьиэтэ суох, ол эрээри үгүс дьон оҕуруоттарыттан, тиэхиньикэлэриттэн туох даҕаны ордубата.
Юрий Трутневы уонна Айсен Николаевы кытта көрсүһүүгэ олохтоохтор судаарыстыбаттан эбии материальнай көмө көрүллүөҕүн сурастылар. Вице-премьергэ эппиттэринэн, эмсэҕэлээбиттэр биир кэмнээх көмөттөн ордук бастакы наадалаах малларын сүтэрбиттэринэн эбии үбүнэн көмөнү эмиэ ылыахтара. Юрий Трутнев көмө толору кээмэйдээхтик көрүллэригэр болҕомто уурулларыгар эттэ. Айсен Николаев хоромньуну ааҕыы үлэтин тэтимирдэргэ эттэ. Эмсэҕэлээбит бар дьоҥҥо барыларыгар көмө көрүллүөҕэ.
Юрий Трутнев социальнай суолталаах эбийиэктэри чөлүгэр түһэриигэ соруктары туруорда — хочуолунай, оскуола, оҕо саада. Үлэ балаҕан ыйыгар диэри бүтүөхтээх. Ол туһугар өрөспүүбүлүкэ былаастара Дьааҥы оройуонугар тустаах матырыйаалы ыларга көмөлөһөллөрө наада. Матырыйааллар номнуо оройуоҥҥа тиэрдиллэн эрэллэр.
Ил Дархан эрдэ иһитиннэрбитинэн, эбийиэктэр оттук сезонугар балаҕан ыйын 1 күнүгэр диэри бэлэм буолуохтаахтар, ол иһигэр ититии ситимэ. Чоҕу куурдууга, дезинфекциялыыр сириэстибэлэри тиэрдиигэ ордук болҕомто ууруллуоҕа.
Дьааҥы үгүс олохтоохторун даамба тутуута долгутар. Бу суох буолан халаан ааннаата. Ууга барбыт нэһилиэнньэлээх пууннарга даамба оруолун кумах уонна гравий булкаастаах оҥоһуулар толороллор. Дьааҥы куорат даамбатын бырайыага 2021 сылтан Уу ресурсаларын федеральнай ааҕыныстыбатыгар баар.
Сири-уоту көрүү уонна олохтоохтору кытта көрсүһүү кэнниттэн Юрий Трутнев Баатаҕайга мунньахтаата уонна тустаах биэдэмистибэлэргэ халаан содулун туоратыыга үлэни ыытарга чопчу сорудахтары биэрдэ.
Ил Дархан уонна Бырабыыталыстыба дьаһалтатын пресс-сулууспата.