Юрий Трутнев Уһук Илин эрэгийиэннэригэр өртөөһүнү хонтуруоллааһыны күүһүрдэргэ соруйда

Ааптар: 
Бөлөххө киир:

Уһук Илин эрэгийиэннэр баһаартан кутталлаах сезоҥҥа бэлэмнэниилэрин боппуруоһугар РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев өртөөһүнү хонтуруоллааһыны күүһүрдэргэ соруйда.

Ойуур баһаарын сезона хайы-үйэ Забайкальскай кыраайга, Хабаровскай кыраай соҕуруу өттүгэр, Амур уобалаһын , Приморье, Бурятия, ЕАУо сирдэригэр-уоттарыгар саҕаланна. Арассыыйа Айылҕа министиэристибэтин чахчытынан, муус устар 5 күнүнээҕи туругунан, тустаах уокурукка 26 ойуур уота турбута бэлиэтэнэн, ол иһигэр Амур уобалаһыгар — 15 баһаар, Приморьеҕа — 8, Бурятиҕа, Забайкальеҕа, ЕАУо-ҕа биирдии түгэн бэлиэтэммиттэр.  Баһаардар үксүн киһи ыытар үлэтиттэн тутулуктаахтар. Ол курдук, сүрүн биричиинэлэргэ тыа хаһаайыстыбатын сирдэригэр сэтиэнэх оту көҥүлэ уонна хонтуруола суох уматыы, ойуурга хаһаайыстыбаннай үлэни ыытыы быраабылатын кэһии (бөҕү уматыы, эстэрии, суолу тутууну сыыһа ыытыы) киирэллэр.

Бырабыыталыстыба тустаах уурааҕынан 2015 сылга тыа хаһаайыстыбатын сиригэр уонна саппаас сиргэ, массыына суолларын балаһаларын таһынааҕы сиргэ, тимир суоллар харабылланар зоналарыгар уо.д.а.  кураанах от үүнээйини уматыыга бобууну олохтообутун  туһунан санатылынна.  Сэтиэнэх, кураанах оту умаппыт дьон административнай эппиэккэ тардыллаллар.

Ол эрээри өртөөһүн, ордук тыа хаһаайыстыбатын сирдэригэр, нэһилиэнньэҕэ былырыыҥҥы үүнээйиттэн ыраастаныы тарҕаммыт ньыманан буолар уонна маассабай көрүҥнээх. РФ гражданскай оборонаҕа, ыксаллаах быһыыга уонна айылҕа иэдээнин туоратыыга миниистирин солбуйааччы Виктор Яцуценко иһитиннэрбитинэн, сыл саҕаланыаҕыттан Уһук Илиҥҥэ баһаары кэтээн көрөр судаарыстыбаннай уорганнар 2,7 тыһыынча көһө сылдьар уонна 1,5 тыһыынча суһал чинчийиилэри-бэрэбиэркэлэри ыытан, хонтуруола суох 405 өртөөһүнү ыыппыттарын туппуттара. Административнай эппиэтинэскэ олохтоох салайыныы биир уоргана, дуоһунастаах 10 киһи, биир юридическй сирэй, ону тэҥэ 51 киһи тардыллыбыта.

Арассыыйа Айылҕа харыстабылын министиэристибэтигэр, Арассыыйа тыатын хаһаайыстыбатын министиэристибэтигэр ойуурга хаһаайыстыбаннай үлэни ыытыыны хонтуруоллааһыны хааччыйыыга уонна ойуур учаастактарын харабыллааһын арендалаһаачылар эппиэтинэстэрин күүһүрдүүгэ этиилэри киллэрэллэригэр этилиннэ.

Вице-премьер Арассыыйа Генеральнай борокуруорун солбуйааччы Дмитрий Демешинтан өртөөһүнү көҥүлэ суох ыытар дьоҥҥо сыһыаннаах борокуруордар ылынар миэрэлэрин күүһүрдэллэригэр көрдөстө.

Маны тэҥэ Юрий Трутнев өрөбүл уонна бырааһынньык күннэргэ дьон сынньанар сирдэригэр баһаартан куттал суох буолуутун ирдэбиллэрин хааччыйыыга эппиэттээх структуралар үрдүк бэлэмнээх буолалларыгар уонна баһаары утары сэрэтэр үлэни тиһиктээхтик ыыталларыгар  соруйда.

Сахагов

Бэлэмнээтэ Женни Стрюкова

Хаартыска: тустаах саайтан

+1
0
+1
0
+1
0
+1
0
+1
0
+1
0
+1
0