Юрий Трутнев: “Уһук Илин эрэгийиэннэрэ баһаартан кутталлаах кэм саҕаланыытыгар толору бэлэмнээх буолуохтаахтар”
РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илин федеральнай уокурукка боломуочуйалаах бэрэстэбиитэлэ Юрий Трутнев Уһук Илин эрэгиийэннэр баһылыктарыгар баһаары утары бэлэмнээх буолууну тус хонтуруолларыгар ылалларыгар соруйда.
“Кэнники сылларга баһаардар Уһук Илин федеральнай уокуругар олорор дьоҥҥо-сэргэҕэ үгүс кыһалҕалары үөскэтэллэр. Забайкалье сэлиэнньэлэригэр буолбут баһаардары, Саха сиригэр ааспыт сайын сатыылаабыт баһаардары умнубаппыт. Ити эрээри, кэнники сылларга баһаартан кутталлаах кэмҥэ бэлэмнэниигэ кэккэ дьаһаллар ылылыннылар”, — диэтэ Юрий Трутнев бу боппуруоска анаммыт сүбэ мунньахха.
Былырыын РФ Бэрэсидьиэнин сорудаҕынан баһаартан куттала суох буолуу миэрэлэрин уонна ойуур уотун умулларыыга федеральнай бүддьүөт үбэ улааппыта. Онон бу сыалга Уһук Илин эрэгийиэннэригэр 5,78 млрд солкуобай көрүллүбүтэ. Уонна бу үп ааспыт сыл ахсынньытыгар эрэгийиэннэргэ тиийбитэ.
Быйылгы сылтан ландшафтнай баһаардары умулларыыны тэрийии эрэгийиэн былаастарыгар сүктэрилиннэ. Федеральнай бүддьүөт үбүнэн уокурук эрэгийиэннэрэ 1951 киһилээх парашютнай-десантнай сулууспаны уонна 4220 киһилэх сирдээҕи ойуур баһаарын сулууспатын бэлэмниэхтээхтэр. Авиаботурууллааһыҥҥа хантараак түһэрсиэхтээхтэр, сирдээҕи сулууспаларга экипировкаларын атыылаһыахтаахтар. Ойуур баһаардарын утары туруулаһыыга эрэгийиэн бүддьүөтүгэр үп эмиэ көрүллүөхтээх.
Эбии үбүлээһин баһаардары уонна халааны туоратыыга “Биир кэлим субсидия” нөҥүө бэриллэр. 2020-2022 сылларга Арассыыйа Илиҥҥи сайыннарыыга министиэристибэтэ түөрт эрэгийиэҥҥэ, ол иһигэр Саха сиригэр 4545 мөл солк. анал тиэхиньикэни атыылаһыыга уонна эмсэҕэлээбит социальнай эбийиэктэри өрөмүөннээһиҥҥэ көрбүтэ.
Бэлэмнэнии үлэтин туһунан эрэгийиэннэр баһылыктара отчуоттаатылар. Саха Өрөспүүбүлүкэтин баһылыга Айсен Николаев этэринэн, бу сыалга федеральнай бүддьүөттэн 1,6 млрд солк. тахса үп көрүллүбүт. Өрөспүүбүлүкэ бүддьүөтүттэн 912 мөл солк. көрүллүбүт, ол эбэтэр 2,5 төгүл былыырыыҥҥыттан элбэх. Үбүлээһин кээмэйэ улаатан, Хаандыгатааҕы, Зырянкатааҕы, Томтордооҕу авиация салааларын тэрийбиттэр, баһаары умулларар сулууспалар ахсааннарын нуормаҕа эппиэтиир гыммыттар. Чуолаан, ойуур баһаарын бохсооччу ахсаана 565 киһиттэн 1119 киһиэхэ диэри тиэрдиллибит. 37 туһаайыынан 27 салгын суудуната ботурууллуоҕа. Сиринэн кэтээн көрүүнү 86 туһаайыынан 4,6 тыһ км усталаах сиринэн ыытыахтара. 32 кэтиир камералаах видеомониторинг ситимэ туһаныллыаҕа.
Уһук Илин эрэгийиэннэригэр туһааннаах управлениелар уонна күүстэр баһаартан уонна халаантан сэрэхтээх буолууларын бэлэмин бэрэбиэркэлээтилэр. Сахалин, Амур уобаластара уонна Чукотка автономнай уокуруга толору бэлэмнээхтэрэ бэлиэтэннэ.
РФ айылҕа баайыгар уонна экологияҕа миниистирэ Александр Козлов иһитиннэрбитинэн, уокурук алта эрэгийиэнигэр ойуур авиациятын үлэтигэр авиацияны фрахтованиелааһын уокурук алта эрэгийиэнигэр (Забайкалье, Приморье, Амур, Сахалин уобаластарыгар, Бурятияҕа, Чукоткаҕа) толору түмүктэммиттэр, түөрт эрэгийиэҥҥэ сорҕото (Саха сиригэр, Камчаткаҕа, Хабаровскай кыраайга уонна ЕАУо-ка).
Баһаары утары парашютнай-десантнай сулууспа үлэһиттэрэ Чукоткаҕа, Саха сиригэр, Магадан уонна Хабаровскай кыраайдарыгар ситэ таҥылла илик.
Ойуур баһаарын бохсууга сирдээҕи сулууспа үлэһиттэринэн хааччыллыы бары эрэгийиэннэргэ штаттан 90 бырыһыана хомулунна.
“Баһаары утары сезоҥҥа бэлэмнэнии эппиэтинэһэ быйыл губернатордарга толору сүктэрилиннэ. Федеральнай бүддьүөттэн үбүлээһин эрэгийиэннэргэ толору кээмэйинэн бэрилиннэ. Сулууспалар ахсааннарын ситэриэххэ, туһаныллар тиэхиньикэни атыылаһыахха”, — диэн түмүктээтэ Юрий Трутнев.
Сахагов
Бэлэмнээтэ Женни Стрюкова
Хаартыска: тустаах саайтан