Кулун тутар 25 күнүн иккис аҥаарыгар РФ бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев «хотугу таһаҕаһы таһыы» боппуруостарыгар Ил Дархан Айсен Николаев кыттыылаах бырабыыталыстыба мунньаҕын ыытта. Бу кэнниттэн кини суруналыыстар ыйытыыларыгар хоруйдаата.
—«Хотугу таһаҕаһы таһыыттан» бородууктаны, эми-тому, о.д.а. тыын суолталаах таһаҕаһы кэмигэр тиэрдии уонна сорох инвестиционнай бырайыактар олоххо киириилэрэ, нэһилиэнньэ олоҕун таһыма тутулуктаах. Онон Уһук Илин эрэгийиэннэригэр биир сүрүн суолталаах боппуруос буолар. Бүгүҥҥү күҥҥэ сыана, кирэдьиити биэрии уонна таһаҕаһы тиэйии усулуобуйалара уларыйдылар, онон билигин суһал миэрэлэри ылымматахпытына, сыана эмискэ үрдээһинигэр тиэрдиэ. Оннукка тиэрдэр табыллыбат. Онон бүгүн биһиги «хотугу таһаҕаһы таһыыга» сыананы намтатарга туһуламмыт кэккэ миэрэлэри ылар туһунан кэпсэттибит. Холобур, кирэдьиит ыстаапкатын бырыһыанын субсидиялааһыҥҥа көмө көрүллүөҕэ. 10% дуу, 24% дуу? Улахан араастаһыылаах. Бу көмө бородууктаны, табаары сөбүгэр сыанаҕа аҕалар кыах биэриэ.
Былырыын Хотугу муора суолугар тырааныспар логистиката уларыйан, ноҕурууска улаатан, сорох таһаҕаһы тиэйээччилэр кыайбакка, суудуналара туран хаалбыттара. Бу мантан түмүктэри оҥорон, быйылгы дьылга үчүгэйдик бэлэмнэнэрбит, суһал салайыы систиэмэтин киллэрэрбит ирдэнэр. Бородуукта кэмигэр уонна сөбүгэр сыанаҕа аҕалыллыахтаах. Уопсайынан, мин Уһук Илиҥҥэ олох таһыма тупсуон баҕарабын. Оттон хотугу таһаҕаһы тиэйии бу манна биир сүрүн суолталаах боппуруос буолар, — диэн кини эттэ.
Таһаҕаһы кэмигэр тиэрдииттэн энэргиэтикэ туруга эмиэ тутулуктаах. “Хотугу таһаҕаһы тиэрдиигэ” кыттар тэрилтэлэргэ 5,5 миллиард солкуобай суумалаах кирэдьииттэр бэриллиэхтэрэ. Арктика улуустарыгар таһаҕаһы тиэрдэр “Якутопторг” тэрилтэ 208 мөлүйүөн солкуобайдаах субсидияны ылыаҕа.
Ангелина Васильева, “Саха сирэ” хаһыат, edersaas.ru
Хаартыска: СИА.