Уопсастыба

Юрий Трутнев «Саюри» үлэтин биһирээтэ

Ил Дархан Айсен Николаев уонна Арассыыйа Бэрэсидьиэнин Уһун Илиннээҕи федеральнай уокурукка боломуочуйалаах бэрэстэбиитэлэ Юрий Трутнев сэтинньи 28 күнүгэр “Саюри” ХЭУо кыһыннары үлэлиир тэпилииссэ комплексыгар сырыттылар.

edersaas.ru

Даҕатан эттэххэ, бу бырайыак Арассыыйа Японияны кытары бииргэ үлэлээһинин чэрчитинэн, Уһук Илин уонна Арктика сайдыытын пуондатын өйөбүлүнэн, “Хаҥалас” урутаан сайдар территория бырагырааматынан тэриллибитэ. Күн бүгүн комплекс холбоон 1,3 гектар иэннээх бастакы уонна иккис түһүмэх тутуулара үлэҕэ киллэриллэн тураллар. Манна Японияҕа оҥоһуллубут, сырдыгы 94 % аһардар үс хостоох пленка туһаныллар. Тэпилииссэ иһинээҕи температура барыта компьютерынан салайыллар, нүөлсүтүү ситимэ гидропоника технологиятыгар олоҕурар. Бырайыак технологическай партнера, «Хоккайдо Корпорэйшн» хампаанньа, бэрэстэбиитэллэрэ комплекс исписэлистэрин кытары тэҥҥэ сылдьан үлэлииллэр.


Үлэһиттэр Айсен Сергеевичка уонна Юрий Петровичка 2020-2021 сс. үлэҕэ киллэриллэрэ былааннанар комплекс үһүс, түмүк, түһүмэҕин былаанын көрдөрдүлэр. Үһүс түһүмэх тутуу 866 мөл. солк сыаналаах, онтон 600 мөл. солк. Уһук Илин уонна Арктика сайдыытын пуондата уйунуохтаах. Кыһыннары үлэлиир тэпилииссэ комплекса силигэ ситтэҕинэ, сыл устатыгар 1119 т оҕурсуу, 780 т помидор уонна 17 т күөх үүнээйи үүннэриллэр буолуоҕа.
Оччотугар өрөспүүбүлүкэ олохтоох оҕуруот аһынан хааччыллыыта биллэрдик үрдэтиллиэҕэ диэн Ил Дархан уонна Бырабыыталыстыба пресс-сулууспата иһитиннэрэр.

Раиса Сибирякова, «Саха сирэ» хаһыат, edersaas.ru

0
0
Telegram @edersaas20

Добавить комментарий