Юрий Трутнев Саха сиригэр Өрөспүүбүлүкэтээҕи кардиологическай киин суолтатын туһунан
Сүрэх-тымыр диспансерын саҥа дьиэтэ тутулуннаҕына, өрөспүүбүлүкэтээҕи кардиологическай киин регионнар икки ардыларынааҕы суолталаах үрдүк технологиялаах аныгы киининэн буолуоҕа.
Арассыыйа Бырабыыталыстыбатын – Арассыыйа Бэрэсидьиэнин Уһук Илин федеральнай уокуругун боломуочуйалаах бэрэстэбиитэлэ Юрий Трутнев бэлиэтээбитинэн, кардиодиспансеры тутуу “эбийиэк иэнин 300 кв.миэтэрэттэн 15 тыһ. кв. м. тиийэ улаатыннарыаҕа. 150 миэстэлээх өрөспүүбүлүкэтээҕи кардиологическай диспансер 1 №-дээх өрөспүүбүлүкэтээҕи балыыһа консультациялыыр-диагностыыр киинигэр – Мэдиссиинэ национальнай киинигэр көһүүнү кытта сибээстээх буолуоҕа. Боломуочуйалаах бэрэстэбиитэл өрөспүүбүлүкэҕэ бу дьоһун суолталаах социальнай эбийиэктэн Дьокуускайга сырыытын саҕалаата.
Юрий Трутнев уопсайа 4 млрд 597 мөл солкуобай суумалаах улахан бырайыагы олоххо киллэрии Саха сирин олохтоохторун үйэтин уһатыыга, “Доруобуйа” национальнай бырайыакка этиллибит тус сыаллаах индикаторы – киһи олоҕун уһунун 2024 сылга 78 сааска уонна 2030 сылга 80 сааска тиэрдиигэ туһуланар диэтэ. “Кардиодиспансер өрөспүүбүлүкэ олохтоохторугар чэгиэн доруобуйалаах буолалларыгар, ыалдьыбаттарыгар, үйэлэрин уһаталларыгар көмөлөһүөҕэ”, — диэтэ кини. Кардиологическай киин кэмигэр тутулуннаҕына, хаан эргиирин ыарыытыттан эрэйдэнэр Саха сирин олохтоохторо үрдүк технологиялаах уонна үрдүк таһымнаах мэдиссиинэ көмөтүн өрөспүүбүлүкэ тас өттүгэр барбакка эрэ туһанар кыахтаныахтара.
Маны сэргэ, боломуочуйалаах бэрэстэбиитэл саҥа кардиологическай кииҥҥэ идэлэрин дэгиттэр баһылаабыт персоналы бэлэмниир наадатын ыйда. “Айсен Сергеевиһи кытта тутуллубут дьиэ иһэ үрдүк кылаастаах исписэлиистэринэн туолаллара наадатын туһунан кэпсэппиппит. Маннык исписэлиистэр өрөспүүбүлүкэҕэ бааллар, ол эрээри атын киэҥ хабааннаах мэдиссиинэнэн хааччыйыыга эбии үлэһит ирдэнэр. Маны бииргэ быһаарыахпыт”, — диэн Юрий Трутнев эрэннэрдэ. Санатан эттэххэ, национальнай бырайыагы олоххо киллэриинэн сибээстээн 30 кардиолог уонна 30 онколог бэлэмнэниллиэҕэ.
Кардиокиини тутуу быйыл саҕаланыаҕа уонна экэнэмиичэскэй үүнүү кииннэригэр социальнай инфраструктураны тэрийиигэ федеральнай бүддьүөттэн Уһук илин регионнарыгар бэриллэр “биир кэлим субсидия” суотугар 2021 сылга түмүктэниэҕэ.
Санатан эттэххэ, туһааннаах быһаарыы Саха сирин Ил Дархана Айсен Николаев кардиокиини уонна өссө икки эбийиэги – Хаҥалас бөһүөлэгэр оскуола-саады уонна Табаҕаҕа “Полярная звезда” оҕо сылы эргиччи сынньанар уонна чэбдигирэр өрөспүүбүлүкэтээҕи киинин Саха Өрөспүүбүлүкэтин экэнэмиичэскэй сайдыытын кииннэрин социальнай сайдыытын эрдэ бигэргэммит былааныгар киллэрэргэ этиитин Юрий Трутнев бэрэссэдээтэллээх хос хамыыһыйа мунньаҕар кулун тутар 14 күнүгэр ылыммыттара. Бу хамыыһыйа 5,2 млрд солкуобай суумалаах эбии федеральнай үбү бу үс эбийиэккэ биэрэр туһунан быһаарыы ылыммыта, балар уопсай суумалара өрөспүүбүлүкэтээҕи кыттыгас үбүлээһини кытта 6,6 млрд солкуобайга тэҥнэһэр.
Саха Өрөспүүбүлүкэтин Ил Дарханын уонна бырабыыталыстыбатын пресс-сулууспата