Юрий Трутнев Роспотребнадзор үлэһиттэригэр судаарыстыбаннай наҕараадалары туттарда

Бүгүн Дьокуускайга РФ Бырабыыталыстыбатын Бэрэссэдэтээлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Пирогов уордьанын уонна Лука Крымскай мэтээлин Роспотребнадзор Саха сиринээҕи салаатын үлэһиттэригэр туттарда.

«Суолталаах үлэни ыытаргыт иһин махтанабын. Коронавирус дьаҥа Арассыыйаҕа эрэ буолбакка, бүтүн аан дойдуга күүскэ тарҕанна. Эһиги бастакынан бэйэҕитигэр туох баар ыараханы ылынаҕыт. Билигин балаһыанньа аматыйан эрэр. Өрөспүүбүлүкэҕэ дьаҥы бохсууга элбэх үлэ ыытыллар. Бу үлэҕэ барыбытыгар ситиһиилэри баҕарабын», — диэн Юрий Трутнев эҕэрдэтин эттэ.

Пирогов уордьанынан 16 сыл ыстаастаах үлэһит, эпидемиологическай нодзуор салаатын начаалынньыга Валентина Ивановна Григорьева уонна 27 сыл ыстаастаах үлэһит  салаатын начаалынньыга Юрий Алексеевич Степанов наҕараадаланнылар.

Оттон Лука Крымскай мэтээлинэн тырааныспарга, санитарнай харыстабылга нодзуор сүрүн исписэлииһэ — эспиэрэ, 16 сыл ыстаастаах үлэһит Эльвира Геннадиевна Земкина, эпидемиологическай нодзуор салаатын сүрүн исписэлииһэ-эспиэрэ, 15 сыл ыстаастаах үлэһит Оксана Семеновна Игнатьева, тырааныспарга, санитарнай харыстабылга нодзуор 1 разрядтаах старшай исписэлииһэ, 14 сыл ыстаастаах үлэһит Александр Владимирович Тихонов наҕараадаланнылар.

Пандемия саҕаланыаҕыттан Дьокуускай, Нерюнгри, Мииринэй, Удачнай, Ленскэй, Усть-Нера аэропуортарыгар алта санитарнай пуост тэриллибитэ. Үлэһиттэр барыта 1086 рейси көрбүттэрэ, 50 тыһыынчаттан тахса пассажир термометрияны ааспыта биллэр. Маны тэҥэ тимир суол вокзалларыгар, обсерватордары тэрийиигэ эмиэ далааһыннаах үлэ ыытыллыбыта.