Уһук Илини уонна Арктиканы сайыннарыы министиэристибэтин коллегиятын мунньаҕар инвестициялары тардыы боппуруостара ырытылыннылар. Мунньахха ТОР (урутаан сайдыы территорията) уонна Владивосток көҥүл пордун сиригэр 2020 сыллааҕы үлэ түмүктэрин оҥордулар уонна 2021 сылга былаан таҥыллыыта көрүлүннэ.
edersaas.ru
— Биһиги уопсай сыалбыт инвестициялар көмөлөрүнэн эрэгийиэҥҥэ саҥа тэрилтэлэри үлэлэтии, олохтоох уонна федеральнай бүддьүөттэри хаҥатыы буолар. Онон хас биирдии инвесторы кытта ыкса үлэлэһиэх тустаахпыт – диэн эттэ Юрий Трутнев.
Бу туһугар эрэгийиэн уонна федеральнай былаас бэрэстэбиитэллэрэ үлэлэрин хаачыстыбатын өрө тардыахтаахтарын туһунан тоһоҕолоон эттэ. Коронавирус хамсыгыттан сылтаан инвестордары кытта ыкса сибээс намтаабытын туһунан бэлиэтээтэ.
— Уһук Илиҥҥэ сайдыыга анаан үп аҕалар урбаанньыттары кытта көрсүү аҕыйаата. Ол аата тустаах информацияны ылыы эмиэ аччаабыт. Дьон Уһук Илин эрэгийиэнигэр биһиэхэ итэҕэйэн манна кэлэллэр. Ол итэҕэли, биэрбит тылбытын хайаан даҕаны толоруох тустаахпыт. Инвесторы кытта ыкса үлэни сөргүтэргэ үлэлээҥ! — диэтэ.
Коллегия түмүгүнэн Арассыыйа бэрэсидьиэнин боломуочунай бэрэстэбиитэлэ Уһук Илини уонна Арктиканы сайыннарыы министиэристибэтигэр уонна эрэгийиэннэр салайааччыларыгар ТОР (урутаан сайдыы территорията) уонна Владивосток көҥүл пордун сиригэр инвестициялары сайыннарыы туһунан этиилэри бэлэмнээн киллэрэллэригэр сорудахтаата.
«Саха сирэ» хаһыат, edersaas.ru
Хаартыска sakha.gov.ru