РФ бэрэсидьиэнигэр Уһук Илин боломуочуйалаах бэрэстэбиитэлэ — вице-премьер Юрий Трутнев Ил Дархан Айсен Николаевы кытары Саха сиригэр энергетика сайдыытыгар мунньах ыыттылар.
Юрий Трутнев мунньахха Саха сиригэр уот ситимэ тохтоло суох үлэлиирин хааччыйыы, энергетика экэниэмикэ бары хайысхатын сайдыытын кытары тэҥҥэ сайдан иһиэхтээҕин, онуоха инфраструктураны сайыннарыы күүскэ барыахтааҕын эттэ.
– Биһиги сүрүн хайысхабытынан Саха сирин уонна Уһук Илин экэниэмикэлэрин сайыннарыы буолар. Онуоха эрэгийиэҥҥэ энергетика эбийиэктэрэ бары тохтоло суох үлэлииллэрэ наада. Манна кэнэҕэскитин энергетиканы туһаныы улаатара учуоттаныллыахтаах. Мунньах кэмигэр Бүлүүтээҕи электростанция сайдыытын боппуруостара турдулар. Манна даҕатан эттэххэ, электростанция үлэлииригэр уу ылыыта кыаллыбат буоллаҕына, атын хайысханан үлэ барыахтаах. Холобур, атын эрэгийиэннэртэн уот ситимин тардыы, тыал, күн уотун туһаныы, намыһах кыамталаах атомнай станциялары тутуу курдук боппуруостары көрөр сөп, – диэн иһитиннэрдэ кини.
Санатан эттэххэ, Саха сирин бырамыысыланнай оройуоннарын Бүлүүтээҕи уонна Светлэйдээҕи электростанциялар хааччыйан олороллор. Кэлиҥҥи сылларга бу станцияларга ноҕорууска икки төгүл улаатта. Онон бу эйгэни сайыннарыы боппуруоһа турар.
“Манна үлэлэһэр хампаанньалар бэйэлэрэ ырытан, суоттаан көрдүнэр. Энергетика эрэгийиэн сайдыытын кытары тэҥҥэ, онно сөп түбэһэн сайдыахтаах”, – диэн бэлиэтиир Юрий Петрович.
Аграфена КУЗЬМИНА