Арассыыйа Федерациятын бырабыыталыстыбатын бэрэссэдээтэлин солбуйааччы – Арассыыйа Федерациятын бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев Дьокуускай куоракка кэлэ сылдьан сүрэх, тымыр ыарыыларын эмтиир киин тутуутун билистэ. 4,6 миллиард солкуобай суумалаах 8 мэндиэмэннээх, 150 куойкалаах саҥа кардиология балыыһата медицина киинин кытта көрүдүөр нөҥүө силбэһиэҕэ.
edersaas.ru
Кардиология киинин тутуу быйыл бэс ыйыгар саҕаланан, 2021 сылга бүтүөҕэ. Маннык бырайыактар дьон олоҕо уһуурун туһугар оҥоһуллаллар диэн бэлиэтээтэ Юрий Трутнев. 2024 сылга диэри сүрэх, тымыр үлэтэ кэһиллиититтэн дьон олохтон туорааһына биллэ кыччыахтаах.
Ону таһынан, доруобуйаларынан хааччахтаах оҕолору үөрэтэр 35 №-дээх оскуолаҕа сылдьан, үөрэнээччилэри, учууталлары кытта көрүстэ. Бу оскуола тутуута үп тиийбэккэ тохтуу сылдьыбыта, онтон федеральнай киинтэн харчы көрүллэн, билигин манна сопртивнай, актовай саала, бассейн барыта баар, онон кэлэктиип аатыттан махталларын биллэрдилэр.
Билигин нэһилиэнньэ биир саамай долгуйар тыын боппуруоһа сапыраапкаларга уматык сыаната үрдээһинэ. «Биир лиитэрэ бэнсиин сыанатын 8-10 солкуобай чэпчэтэргэ гааһы переработкалыыр салаа сайдыан наада. Убатыллыбыт айылҕа гааһын уонна моторнай оттугу оҥорон таһаарар бырайыагы олоххо киллэрдэхпитинэ ити кыаллыаҕа», — диэн эттэ Ил Дархан Айсен Николаев.
Бүгүҥҥү мунньахха «Хотугу сулус» сылы эргиччи үлэлиир оҕону чэбдигирдэр, сынньатар лааҕыр тутуутун, Саха АССР төрүттэммитэ 100 сылыгар бэлэмнэнии тула Юрий Трутневы кытта кэпсэттилэр.
Марианна ТЫРТЫКОВА, «Саха сирэ» хаһыат, edersaas.ru