Бүгүн Быыбар күн РФ бэрэсидьиэнин Уһук Илин регионнарга боломуочуйалаах бэрэстэбиитэлэ, вице-премьер Юрий Трутнев Хотугулуу-Илиҥҥи федеральнай университет «Сэргэлээх уоттара» Култуурунай киинигэр быыбардаата.
edersaas.ru
Суруналыыстар: «Тоҕо чуолаан университекка кэлэн куоластаатыҥ?» — диэн ыйытыыларыгар:
— Үөрэхтээһин — дойдубут кэскилэ. Арассыыйабыт кыаҕа, күүһэ үөрэхтээһиҥҥэ буоларын быһыытынан, биһиги сүрүн сорукпутунан үөрэхтээһин тиһигин, үөрэх кыһаларын тупсарыы буолар. Уһук Илиҥҥи федеральнай уокурук сайдыытыгар эппиэттээх киһи буоларым быһыытынан, бу сиргэ куоластыырым ордуга чахчы. Ол иһин бүгүн Дьокуускайга быыбардаан баран, киэһэ дьиэбэр төннүөм, — диэн хоруйдаата.
Арассыыйа бэрэсидьиэнин Уһук Илиҥҥэ боломуочунайа Юрий Трутнев бэлиэтээбитинэн, бу сарсыардааҥҥы чахчынан, урукку сылларга тэҥнээтэххэ, быыбардааччылар бэйэлэрин учаастактарыгар хото кэлэн эрэллэр.
— Биһиги хас биирдиибит тус кыттыыта суох туох да уларыйыы, инникигэ хардыы оҥоһуллубат. Ол ону бу маннык быыбар курдук хамсааһыҥҥа норуот сомоҕолоһуута көрдөрөр. Дойдуга араас кэскиллээх бырайыактар олоххо киирэллэр. Дьон онно быһаччы кыттыһар буолан, өйдүүр, өйүүр, — диэн бэлиэтээтэ Юрий Трутнев.
706 №-дээх «Сэргэлээх уоттара» ХИФУ Култуурунай киинигэр сүрүннээн устудьуоннар куоластыыллар. 1867 куоластааччылаах (90% — устудьуон) быыбардыыр учаастакка 10 чаастааҕы туругунан 320 киһи (17%) куоластаата.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Мария Васильева уонна ааптар түһэриитэ.