РФ бырабыыталыстыбатын бэрэссэдээтэлин солбуйааччы, Уһук Илиҥҥи федеральнай уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев РФ бырабыыталыстыбатын бэрэссэдээтэлэ Михаил Мишустин бэҕэһээ Дьокуускайга оробуочай сырыытын туһунан санаатын үллэһиннэ.
— Мин санаабар, кини IТ-пааркаҕа сырыытыттан олус үчүгэй санаалар хааллылар. Кини сыыппараҕа көһүүнү, аныгы технологиялары туһаныыны куруук бырабыыталыстыбаттан ирдиир. Биһиги Саха сирин IТ-пааркатыгар араас хайысхаҕа туох үлэ ыытылларын көрбүппүт. Доруобуйа харыстабылын, дойдуга оҥоһуллар киинэ быракаатын кытта сибээстээх хас да бырайыак интэриэһи тарта. Итилэртэн тугу өйүүрбүтүн көрүөхпүт. Тоҕо диэтэххэ, бырайыактары билиһиннэрбит биир идэлээхтэрбит сорох бырайыактарыгар Михаил Мишустин тугу оҥорорго уонна салгыы хайдах үлэлииргэ соруктары туруорда.
Ону таһынан, мин бэлиэтээн этиэм этэ: РФ бэрэсидьиэнэ Владимир Путин, РФ бырабыыталыстыбатын бэрэссэдээтэлэ Михаил Мишустин сорудахтарынан, Уһук Илиҥҥэ ылыллыбыт дьаһаллар баһаары уонна халааны утары охсуһуу дьиҥнээх сыыппаратын кытары сибээстээх балаһыанньаны биллэ уларыттылар. Холобур, билигин баһаар иэнэ былырыыҥҥы бу кэмнээҕи көрдөрүүтээҕэр 3,5 төгүл аҕыйах. Саҥа умуруоруллар баһаардар ахсааннара элбээтэ, биһигини олус элбэх үлэ күүтэр.
Надежда ЕГОРОВА, «Саха сирэ», edersaas.ru