Бэлиитикэ Уопсастыба Экэниэмикэ

Юрий Трутнев: “Бородуукта сыанатын кытаанах хонтуруолга ыллыбыт”

Бүгүн, кулун тутар 24 күнүгэр, РФ Бэрэсидьиэнигэр Уһук Илин боломуочуйалаах бэрэстэбиитэлэ — вице-премьер Юрий Трутнев  Саха сиригэр оробуочай  сырыытынан кэллэ.  Вице-премьер кэккэ сүбэ мунньахтары ыытта. Чуолаан  потребительскай ырыынакка үөскээбит балаһыанньаны,  хоту таһаҕаһы тиэйии боппуруостарын быһаарыста, көрдө-иһиттэ.

«Биһиги сыана хайдах туруктааҕын анаалыстаан көрдүбүт. Бородууктанан хааччыйыыга ханнык да кыһалҕа тахсыа суоҕа, барыта хонтуруолланар. Үгүс өттүгэр нэһилиэнньэ бородуукта бүтүө диэн аймалҕаны таһаарар.  Сыананы аһары үрдэтиигэ антимонопольнай сулууспа уонна борокуратуура ылсан үлэлээн эрэллэр. Сыана үрдэһиинэ үскүн ас-үөл суох буолуо диэн аһара дарбатыыттан таҕыста диэн быһаарабын. Урбаанньыттар элбэх үбү ыла охсоору, үспүкүлээннии сыһыаннаһан сыананы үрдэтэргэ ылсыбыттара биллэр. Ол эрээри, маны антимонопольнай сулууспа кытаанах хонтуруолга ылла», — диэн Юрий Петрович иһитиннэрдэ.

Салгыы Ил Дархан Айсен Николаев: «Биһиги биисинэһи өйүүргэ кэккэ миэрэлэри ылынан олоробут. Холобур, нолуогу биллэрдик түһэрдибит. Бу улахан өйөбүл. Бүддьүөттэн көмө быһыытынан 2,5 млрд. солк кэриҥэ көрүллүө. Ас-үөл өттүгэр этэр буоллахха, Аллараа Бэстээххэ бородуукталаах 100-тэн тахса вагону күн аайы сүөкүүллэр. Онон бородууктанан, табаарынан хааччыллыыбыт этэҥҥэ. Бастаан утаа дьон ыксыыр, айманар кэмигэр атыылаһыы күүскэ баран, бородуукта, табаар аҕыйыы сылдьыбыта. Билиҥҥи этэҥҥэ буолла», — диэн быһааран биэрдэ.

Салгыы Юрий Трутнев үөрүүлээх быһыы-майгы ортотугар былырыын ойуур баһаардарын умулларыыга таһаарыылаахтык, ис сүрэхтэриттэн ылсан үлэлээбит Сунтаар улууһун баһылыгын бастакы солбуйааччы Николай Александровка, «СӨ волонтердары кытта үлэҕэ киин» дириэктэрин солбуйааччы Айыллаан Винокуровка, Дьокуускайдааҕы юридическай-полицейскай кэллиэс филиалын устудьуона Алексей Леонтьевка, «Таатта  нэһилиэгэ” МТ баһылыга Егор Павловка уонна СӨ Бырабыыталыстыбатын бэрэссэдээтэлин бастакы солбуйааччы Дмитрий Садовниковка РФ Бэрэсидьиэнин Бочуотунай грамоталарын туттартаата.  Санатар буоллахха, Владимир Путин былырыын алтынньы 14 күнүнээҕи дьаһалынан Саха Өрөспүүбүлүкэтиттэн биэс киһини ойуур  баһаардарын умуруорууга быыһыыр-умуруорар үлэни кэмигэр уонна үрдүк таһымнаахтык тэрийбиттэрин иһин  Бочуотунай грамоталарынан наҕараадалаабыта.

Юрий Трутнев Саха сирин потребительскай ырыынагар быһыы-майгы туһунан сүбэ мунньаҕы ыытта. Мунньахха Айсен Николаев кууһунан уонна биирдиилээн атыыны- эргиэнин өйүүргэ туһуламмыт этиилэрин оҥордо.

«Өстүйбүт дойдулар биһиэхэ хааччах оҥорбут кэмнэригэр, экэниэмикэҕэ, логистикаҕа деформация тахсар. Российскай Федерация Бырабыыталыстыбатын, бары субъектар салалталарын бу быһыыга-майгыга сүрүн сорукпут — олохтоох дьон интэриэстэрин көмүскээһин, аһынан-үөлүнэн, эминэн-томунан хааччыйыы, тырааныспарга мэһэй-таһай тахсыбатын ситиһии. Сыана үрдүүрүн хонтуруолга тутуохтаахпыт, наада буоллаҕына онно дьайыахтаахпыт «, — диэтэ Юрий Трутнев.

Александр Тарасов, «Саха сирэ».

0
0
Telegram Whatsapp