Юрий Трутнев Бэс Күөлүгэр саҥа тутуллубут дьиэлэр хаачыстыбаларын көрдө-иһиттэ

Бүгүн, сэтинньи 18 күнүгэр, РФ Бырабыыталыстыбатын Бэрэссэдээтэлин солбуйааччы, РФ Бэрэсидьиэнин Уһук Илин уокуругар боломуочуйалаах бэрэстэбиилэ Юрий Трутнев Дьокуускайга оробуочай сырыытынан кэлэн, Ил Дархан Айсен Николаевтыын Горнай улууһун Атамай нэһилиэгэр Анна уонна Алексей Ивановтар дьиэлэрин көрөн баран, суруналыыстарга санааларын үллэһиннилэр.

Юрий Трутнев: «Дьон тутуллубут дьиэни сылаас диэтэ. Саамай сүрүнэ — ол, кинилэр этэҥҥэ диир буоллахтарына, бэрт. Ивановтар дьиэ кэргэн ийэлэриттэн эбии туох эмит оҥоһуллара баар дуо диэбиппэр, барыта этэҥҥэ диэтэ. Аҕыйах кэм иһигэр дьиэлэр туттуллан киирбиттэрэ махталлаах дьыала. Салгыы Бэс Күөлүгэр 150 миэстэлээх, икки этээстээх оскуола тутуллуохтаах, ол эһиил саҕаланыан наада», — диэн санаатын үллэһиннэ.

Уһук Илиҥҥи уокурукка боломуочуйалаах бэрэстэбиитэлэ Юрий Трутнев салгыы Алексей Петров бааһынай хаһаайыстыбатыгар 100 төбө сүөһү турарыгар аналлаах саҥа хотону көрдө. Санатар буоллахха, атырдьах ыйынааҕы ойуур баһаара дьиэлэри эрэ буолбакка, бу улахан хаһаайыстыба хотонун эмиэ имири кэриэтэ салаан ааспыта. Хотону «Хаҥалас тутуу» ХЭУо аҕыйах кэм иһигэр тутан үлэҕэ киллэрбитэ.

Александр Тарасов.