Юрий Трутнев Бэс Күөлүгэр эдэр ыалга ыалдьыттаата

Ааптар: 
Бөлөххө киир:

Бүгүн, сэтинньи 18 күнүгэр, РФ Бырабыыталыстыбатын Бэрэссэдээтэлин солбуйааччы, РФ Бэрэсидьиэнин Уһук Илин уокуругар боломуочуйалаах бэрэстэбиилэ Юрий Трутнев Дьокуускайга оробуочай сырыытынан кэлэн, тута кэриэтэ Ил Дархан Айсен Николаевтыын Горнай улууһун Атамай нэһилиэгэр тиийэн, олохтоохтору кытта көрүстэ, тутуллубут саҥа дьиэлэри көрдө-иһиттэ.

Санатар буоллахха, Атамайга ойуур баһаарыттан алдьархай тахсыбытын кэнниттэн тута чөлүгэр түһэрии үлэлэрэ саҕаламмыттара. Сөптөөх дьаһал кэнниттэн атырдьах ыйын 20 күнүгэр бастакы дьиэлэр сыбаайалара түһэриллибиттэрэ уонна ити кэнниттэн түүүннэри-күнүстэри үлэлээбиттэрин түмүгэр, аҕыйах кэм иһигэр, алтынньы 18 күнүгэр, «Кэскил» түөлбэтин чөлүгэр саҥа 34 дьиэни тутуу түмүктэнэн бүтэһик туочука түһэриллибитэ.

Атамайга тутуллуохтаах 150 миэстэлээх, икки этээстээх дьиэ тутууга былааҥҥа баарын туһунан Горнай улууһун баһылыга Никита Андреев иһитиннэрдэ. Оскуола бырайыагын оҥоруу барар, этэҥҥэ буоллаҕына, аны сайын тутуу саҕаланыаҕа.

Юрий Трутнев Атамайга тиийээт, икки кыыс, икки уол оҕолоох Aнна уонна Алексей Дмитриевтарга сылдьан, саҥа дьиэлэрэ-уоттара хайдаҕын-тугун ыйыталаста, көрдө. Ыал ийэтэ Анна Викторовна Атамайдааҕы сынньанар, култуурунай кииҥҥэ мусукаан быһыытынан үлэлиир, ыал аҕата Алексей Дмитриевич ити этиллибит кииҥҥэ харабылынан үлэлиир. Дьиэ кэргэн нэһилиэк олоҕор-дьаһаҕар, араас хабааннаах тэрээһиннэригэр барытыгар кэриэтэ көхтөөхтүк кыттар. 115 кв. м иэннээх, саҥа дьиэлээхтэр.

«Дьиэбит олус сылаас, оҕолорбут абыраннылар. Хосторо иккис этээскэ бааллар. Түгэнинэн туһанан, Ил Дархаммыт Айсен Николаевка, бары тутааччыларга, Саха сирин олохтоохторугар дьиэ кэргэним аатыттан махталбын тиэрдэбин. Ыарахан, уустук кэммитигэр күүс-көмө буолаҥҥыт барытын этэҥҥэ аастыбыт, кыстыгы бары сабыс-саҥа дьиэҕэ-уокка көрүстүбүт, үөрүүбүт муҥура суох», — диэн махтал тылларын аҕа баһылык эттэ.

Александр Тарасов.

Ааптар хаартыскалара.

+1
0
+1
0
+1
0
+1
0
+1
0
+1
0
+1
0