Юрий Трутнев айдааннаах “Симиир” хампаанньа дьиэлээхтэрин кытары көрүстэ

Бүгүн Ил Дархан Егор Борисов уонна РФ бырабыыталыстыбатын вице-премьера Юрий Трутнев Дьокуускайга “Симиир” хампаанньаны кытары өлүүлэһэн дьиэ тутуутугар кыттыспыт дьону көрүстүлэр. Хампаанньа бу дьиэтин 2015 с. тутан бүтэриэхтээх этэ. 

Санатан эттэххэ, бу дьиэ Чайковскай уулуссаҕа турар. 2015 с. тутуллан бүтэн үлэҕэ киириэхтээх этэ. Хампаанньа дуогабарыгар уларытыыны киллэрэн, тутуу болдьоҕун 2017 с. иккис кыбаарталыгар диэри көһөрөн биэрбитэ да, күн бүгүҥҥэ диэри хаһаайыттар күлүүстэрин илиилэригэр тута иликтэр. Былырыын өлүүлэһээччилэр бэйэлэрэ ирдэһэн, СӨ бырабыыталыстыбатын кыттыһыннаран, тутааччыны отчуоттатан кыра да буоллар хамсааһыны таһаарбыттара. Ол эрээри аал баһа хоҥнон биэрбэт.
Юрий Петрович: “Холуобунай дьыаланы тиһэҕэр тириэрдиэххэ наада. Дьону албыннаабыттары барыларын миэрэҕэ тардыахха. Ону сэргэ бу тутууга эппиэтинэстээхтэри эмиэ көрүөххэ. СӨ тутуутун министиэристибэтэ бу дьиэни хонтуруолга ылбыт эбит. Уонна тоҕо көрбөтүй? Манна эмиэ туһааннаах миэрэлэри ылыахха”, — диэн бэлиэтээтэ уонна биир ый иһинэн дьоҥҥо күлүүһү бэрдэрэргэ эттэ.

Аграфена КУЗЬМИНА, “Саха сирэ” хаһыат,  edersaas.ru