Юрий Трутнев: «Маннык киэҥ далааһыннаах бырайыак Арассыыйаҕа өссө суох этэ»

Арассыыйа Бэрэсидьиэнин Уһун Илиннээҕи федеральнай уокурукка боломуочуйалаах бэрэстэбиитэлэ Юрий Трутнев Нерюнгри оройуонугар оробуочай сырыытын иһинэн Арассыыйа биир саамай бөдөҥ чох хостуур «Инаглинскайдааҕы» шахтатыгар уонна «Инаглинскай-2» байытар фабрикаҕа сырытта. Кинини кытта СӨ Ил Дархана Айсен Николаев сырытта. edersaas.ru

Санатар буоллахха, «Инаглинскай» ГОК инвестицията 72 млрд солкуобайга тэҥнэһэр. 4045 үлэ миэстэтин арыйар былааннаах. Билиҥҥи туругунан, 2,5 тыһыынча үлэ миэстэтэ арыллыбыта, 20 млрд солкуобайдаах инвестиция олоххо киирбитэ.

«Инаглинская-2» хайа байытар фабриката «Инаглинскай» шахта уонна аан дойдуга чоҕу оҥорон таһаарыыга уонна экспортка Арассыыйаны үс иһигэр киллэриэхтээх. Бу биллэн турар, «Колмар» чоҕу хостуур хампаанньа сүдү суолталаах бырайыага. Былаан быһыытынан, бу эбийиэктэртэн саамай элбээбитэ сылга 12 мөлүйүөн туонна чоҕу хостоон таһаарыахтаах.

Полпред маны сэргэ «Инаглинская» шахта төрдүгэр тиийэн, тутуллуохтаах үлэлэри көрдө. Шахта бастакы лавата 150 миэтирэ дириҥнээх. Шахта бүтүннүү 2022 сылга үлэҕэ киирэрэ былааннанар.

Юрий Трутнев Уһук Илин чох хостуур биир саамай бөдөҥ тэрилтэ үлэҕэ киириэҕиттэн, Азия-Чуумпу акыйаан эрэгийиэнин дойдуларыгар кокстаммыт чоҕу оҥорон таһаарыыга, эргиниигэ биир тиһик үлэлиир. Маннык киэҥ далааһыннаах үлэ аныгы Арассыыйаҕа өссө суох этэ диэн бэлиэтээтэ.

“Бөдөҥ инвестиционнай бырайыак олоххо киириитэ судаарыстыба уонна урбаан бииргэ үлэлэһиитин үтүө көрдөрүүтэ буолар. Уһук Илин сайдыытыгар экэниэмикэҕэ бары өттүттэн табыгастаах саҥа механизмы туттуу түмүгүн манна көрөбүт. Маннык эрэгийиэн социальнай-экэнэмиичэскэй  сайдыытын кэрэһэлиир улахан бырайыактары хайаан да өйүөх тустаахпыт”, — диэн Юрий Трутнев эттэ.

Ил Дархан Айсен Николаев бөдөҥ бырайыак олоххо киириэҕиттэн Нерюнгри оройуона иккис тыынын ылла, үлэ миэстэтэ тахсан, социальнай эбийиэктэр, олорор дьиэ тутуллуута элбээн, дьон-сэргэ олоҕор сэргэхсийии биллэр диэн тоһоҕолоон эттэ.

Ирина Ханды, “Саха сирэ” хаһыат, edersaas.ru

Хаартыска: Андрей Сорокин