Юрий Трутнев уонна Марат Хуснуллин тутууга анаммыт мунньаҕы ыыттылар
Кинилэр видео-кэмпириэнсийэ сибээһинэн тутууну сайыннарыыга туһуламмыт сүбэ мунньаҕы Уһук Илин эрэгийиэннэрин баһылыктарын кытта ыыттылар.
Сүбэ мунньахха эрэгийиэннэри кытта “Дьиэ-уот уонна куорат эйгэтэ”, “Куттала суох уонна хаачыстыбалаах массыына суоллара” национальнай бырайыактары толорууну көрдүлэр. Саха сирин баһылыга Айсен Николаев бу мунньахха кытынна.
Юрий Трутнев эппитин курдук, РФ Бырабыыталыстыбата Уһук Илини сайыннарыыга үлэни салгыы ыытар. “Бүгүн Уһук Илин инвестицияны тардыыга инники иһэр. Уһук Илиҥҥэ тас дойдулартан инвестиция 30 бырыһыана киирэр. Бүгүн судаарыстыба өйөбүлүнэн 2551 инвестиционнай бырайыак олоххо киирэр, маныаха 177 тыһыынча үлэ саҥа миэстэтэ тэриллиэхтээх. Судаарыстыба өйөбүлүнэн 342 тэрилтэ тутулунна. Урутаан сайдыы 22 сирэ-уота ситиһиилээхтик үлэлиир”, — диэтэ кини.
Ол эрээри Уһук Илини хас да уонунан сыл устата баахта бириинсибинэн баһылааһын ыытылларын санатта. Ол түмүгэр мэдиссиинэ өҥөлөрө, үөрэхтээһин, массыына суолларын туруктара, дьоҥҥо наадалаах инфраструктура атын эрэгийиэннэрдэээҕр арыыча хаалан иһэр эбит. Бу соруктары быһаарар туһуттан РФ Бэрэсидьиэнин ыйааҕынан Бырабыыталыстыба Уһук Илини 2024 сылга диэри уонна 2035 сылга диэри кэскиллээх сайыннарыыга национальнай бырагырааманы бигэргэппит.
«Госсэбиэт ааспыт мунньаҕар олорор дьиэни уонна суолу-ииһи тутууга саҥа соруктар чопчуламмыттар, балары 2024 сылга уонна инникитин 2030 сылга диэри ситиһиллиэхтээх. Владивостокка уонна Приморьеҕа сыллата хас биирдии киһиэхэ биирдии миэтэрэни тутуохха. Маннык сорук туруохтаах. Тутуон баҕалаахтары өйүөххэ”, — диэн Марат Хуснуллин бэлиэтээтэ.
Маны сэргэ “Уһук Илин” ипэтиэкэ тутуу салаатыгар үтүө өрүттээхтик дьайарын кини бэлиэтээтэ. Бу сыл балаҕан ыйын 24 күнүнээҕи туругунан 45 тыһыынча сайаапка киирэн, 68 бырыһыана бигэргэммит. Чэпчэтиилээх ипэтиэкэни 11,1 тыһыынча ыал ылбыт.
Куораты тутуу бэлиитикэтэ тиһиктээх буолара наадатын ыйдылар. Юрий Трутнев этэринэн, Уһук Илин үгүс эрэгийиэннэригэр архитектура сэбиэттэрэ суохтар. “Куораты тутуу кураанах учаастагы булан, тугу эмэ тутуунан муҥурданар. Архитектураҕа сыһыаннаах үчүгэй толкуй суох”, — диэн вице-премьер чопчулаата.
“Дьиэни-уоту тутууну салайыыга сыһыаны уларытыахха. Тутууну салайар штабтары тэрийиэххэ. Инвестордары, сетевиктэри мунньуҥ, архитектордары ирдээҥ, кинилэри үөрэтиҥ. Баар ньымалары барытын туһаныҥ”, — диэн сүбэлээтэ Марат Хуснуллин.
Мунньахха саахалланар туруктаах дьиэлэртэн көһөрүүгэ болҕомто уурулунна. Марат Хуснуллин этэринэн, судаарыстыбаннай Дуума көрүүтүгэр саахалланар туруктаах дьиэлэртэн көһөрүүгэ туһуламмыт сокуону киллэрбиттэр. Сокону ылыннахтарына, маннык туруктаах дьиэлэртэн көһөрүүнү бүддьүөт уонна тас источниктар көмөлөрүнэн ыытыахтара. “Дьиэ-уот уонна куорат эйгэтэ” национальнай бырайыак чэрчитинэн бэрэсидьиэн быһаарыытынан 50 млрд тахса үп эбии көрүллүбүт, итини дьону көһөрүүнү урутаан ыыппыттар ылыахтара.
Суол туругун эмиэ дьүүллэстилэр. Юрий Трутнев бэлиэтээбитинэн, уокурук субъектарыгар эрэгийиэн суолталаах массыына суолларын 60 бырыһыана ирдэбилгэ сөп түбэспэт.
“Суолу тутуу кээмэйин куоһарарга бэлэм эрэгийиэннэр эбии үбү ылбыттара. Онон эрэгийиэннэр баһылыктара үс сыллаах былааны оҥостуохтааххыт. Росавтодорга түһэрбит иһитиннэриилэргитигэр олоҕуран, үбүлээһин тыырыллыа, эбии үп ылар кыахтаныаххыт”, — диэтэ Хуснуллин.
Онон Уһук Илин эрэгийиэннэригэр олус суолталаах мунньах ыытыллыбыт.
СӨ Ил Дарханын уонна бырабыыталыстыбатын пресс-сулууспата.
Женни Стрюкова бэлэмнээтэ.
Хаартыска: тустаах саайтан