Юрий Трутнев Чайыҥдаҕа ыарыы тарҕамматын туһуттан миэрэлэри ыларга сорудахтаата
Арассыыйа Бэрэсидьиэнин Уһун Илиннээҕи федеральнай уокурукка боломуочуйалаах бэрэстэбиитэлэ Юрий Трутнев Саха Өрөспүүбүлүкэтин, федеральнай министиэристибэлэр уонна биэдэмистибэлэр салалталарын кытта суһал мунньахха сорудахтары биэрдэ.
«Дьон олоҕор уонна доруобуйатыгар куттал суоһаабатын мэктиэлиэх тустаахпыт. Чайыҥдаҕа үлэлии кэлбит дьон боппуруоһун быһаарыахха наада: ыалдьыбыт дьон эмтэниитин тэрийиэххэ, үлэһиттэри медикаменынан хааччыйыахха, дьону таһаарыахха наада», — диэн Юрий Трутнев бэлиэтээтэ.
Муус устар ый бүтүөр диэри Роспотребнадзор вице-премьерын сорудаҕынан, Чайыҥдаҕа олорор уонна үлэлиир дьонтон барыларыттан анаалыс тутуохтаахтар. Арассыыйа Доруобуйа харыстабылыгар министиэристибэтигэр уонна Ыксаллаах быһыы-майгы министиэристибэтигэр кылгас кэм иһигэр мобильнай госпиталь тэрийэр, наадалаах тэрил, эмп-том баар буоларын дьаһайар туһунан сордухтанна. Роспотребнадзор, Арассыыйа Доруобуйа харыстабылын министиэристибэтэ «Газпром» хампаанньаны уонна СӨ бырабыыталыстыбатын кытта Чайыҥда баахтабай бөһүөлэктэрин олохтоохторо харантыыны тутуһалларын, дезинфекция оҥоһулларын, аһынан-үөлүнэн, эминэн хааччыллалларын туһунан миэрэлэри ылыныахтаахтар.
Оттон ыам ыйын 1 күнүгэр диэри тустаах министиэристибэлэр, СӨ бырабыыталыстыбата уонна «Газпром» Чайыҥдаттан, бастатан туран, коронавирус дьаҥыгар сутуллубут ыарахан туруктаахтары уонна бары ыалдьыбыт дьону бөһүөлэктэн РФ атын субъектарыгар баар балыыһаларга таһаарар туһунан былааны толкуйдуохтаахтар.
Санитарнай-эпидемиологическэй ирдэбиллэри кэһиини прокуратура бэрэбиэркэлииригэр сорудахтаатылар.
Чайыҥдаҕа «Газпромҥа» бэдэрээттиир тэрилтэлэр иһинэн үлэлиир 34 баахтабай бөһүөлэккэ 10 тыһыынча киһи олорор. Билигин онно «Газпром» уонна СӨ Роспотребнадзорун управлениетын исписэлиистэрэ үлэлии сылдьаллар. Билиҥҥитэ 56 киһи Саха сирин балыыһаларыгар эмтэнэр, өссө 39 киһи Ямал-Ненец автономнай уокуругун балыыһаларыгар баар.
Арассыыйа Бэрэсидьиэнин
Уһун Илиннээҕи федеральнай уокурукка
боломуочуйалаах бэрэстэбиитэлин
аппаратын пресс-сулууспата.