Юрий Куприянов: “Тыа сирин култууратын үлэһитэ” бырагырааманы өйөөтүлэр
Бүгүн СӨ Бырабыыталыстыбатын отчуотун кэмигэр быһа сибээскэ устудьуон төлөпүөннээн, “Тыа сирин култууратын үлэһитэ” бырагыраама туһунан туоһуласта.
Тустаах ыйытыыга СӨ култууратын уонна духуобунай сайдыытын миниистирэ Юрий Куприянов: “Үөрэхтэрин бүтэрбит дьону үлэ миэстэтинэн хааччыйар, усулуобуйа олохтуур инниттэн СӨ Култуурата, СӨ Бырабыыталыстыбата “Тыа сирин култууратын үлэһитэ” диэн бырагыраама этиитин киллэрбитэ. Тустаах бырайыагы өйөөтүлэр. Уһук Илин уокуругу сайыннарыы бырагырааматыгар киирдэ, РФ Бырабыыталыстыбата бигэргэттэ. 2022 сылтан ыраах нэһилиэнньэлээх пууннары, хотугу сири үлэ миэстэтинэн хааччыйар инниттэн үбүлээһин көрүллүөхтээх. Ис хоһооно эмиэ “Земскэй учуутал», “Земскэй дуоктар” курдук эдэр дьону өйүүр соруктаах. Кэлэр сылтан түөрт сыл устата бырагырааманан 378 саҥа миэстэни биллэрдибит. Бастатан туран, Оҕо искусствотын оскуолаларын преподавателлэрин өйүүр санаалаахпыт. Чугастааҕы сылларга Оҕо искусствотын оскуолаларыгар улахан өйөбүл оҥоһуллуоҕа”, — диэн эттэ.
Людмила ПОПОВА, “Саха сирэ” хаһыат, edersaas.ru
Хаартыска: СИА.