Өрөспүүбүлүкэтээҕи “Ыччат олоҥхоһут” түмсүү салайааччыта Юрий Борисов «ААТТААХ ОЛОҤХОҺУТТАР ААРТЫКТАРЫНАН, ЫТЫК КЫРДЬАҔАСТАР ЫЛЛЫКТАРЫНАН» диэн ааптарыскай экспериментальнай бырайыагын салҕаан, кулун тутар 2 күнүгэр Нам улууһун икки нэһилиэгэр — Бөтүҥҥэ уонна Модутка тиийэн, нэһилиэнньэҕэ «Баһырҕастаах аттаах Баабый Боотур» олоҥхотун толорон иһитиннэрдэ.
—-Итини тэҥэ Бөтүҥҥэ, ааттаах бэйиэт Ефрем Степанович Сивцев-Таллан Бүрэ аатынан мусуойу илэ харахпынан көрдүм. Модутка олус тупсаҕай оҥоһуулаах балаҕан дьиэҕэ олоҥхолоотум. Икки нэһилиэккэ уопсайа киирэ-тахса 40-ча киһи сырытта. Олоҥхо бүтүөр диэри иһийэн олорон аҕыйах киһи иһиттэ.
Түгэнинэн туһанан, Бөтүҥ уонна Модут култууратын үлэһиттэригэр быыс-арыт булан бүгүҥҥү тэрээһиннэр үрдүк таһымнаахтык баралларыгар күүс-көмө буолбуттарыгар муҥура суох махтанабын. Итини тэҥэ сүһүөхтээх бэйэм сүгүрүйэн туран, хоолдьуктаах бэйэм хоҥкуйан туран барҕа баһаам махталбын Бөтүҥ нэһилиэгин кулуубун дириэктэригэр Михаил Алексеевич Макаровка тиэрдэбин. Чахчы саха омук төрүт култууратын сэргиир, сэҥээрэр кэтит кэскиллээх эдэр салайааччы эбит.
Мантан салгыы Хатырык нэһилиэгэр тиийиэҕим, — диэтэ Юрий Петрович.
Санатан эттэххэ, эдэр олоҥхоһут бу бырайыага аны сайын Намҥа буолар “Олоҥхо ыһыаҕа-2019” көрсө ыытыллар.
Татьяна Маркова, edersaas.ru