Андрей Борисов айар декадатын чэрчитинэн, ыраахтан-чугастан элбэх ыалдьыт кэлэн, тэрээһиннэргэ кытынна.
edersaas.ru
Кинилэртэн биирдэстэрин -– ЮНЕСКО посола, Евразия норуоттарын ассамблеятын генеральнай сэкиритээрин хос бэрэссэдээтэлэ, философия наукатын доктора, биллэр уопсастыбанньык, Арассыыйа Суруйааччыларын сойууһун чилиэнэ, бэйиэт Александра Очированы кытары Национальнай бибилэтиэкэҕэ көрсүһүү буолла. Кинини кытары Норуоттар икки ардыларыгар бииргэ үлэлээһиҥҥэ генеральнай секретариат салайааччытын солбуйааччы Юлия Игоревна Петрова уонна «Живые города» сири-уоту сайыннарыы лиидэрдэрин сойууһун бэрэссэдээтэлэ Александра Олеговна Лазукина бааллар.
Бочуоттаах ыалдьыттары Алтай Өрөспүүбүлүкэтин судаарыстыбаннай сүбэһитэ Иван Белеков, СӨ Ил Дарханын судаарыстыбыннай сүбэһитэ Андрей Борисов, СӨ духуобунаска академиятын вице-бэрэсидьиэнэ, СӨ Судаарыстыбаннай бириэмийэтин лауреата Олег Сидоров, СӨ норуодунай суруйааччыта Николай Лугинов, «Айар» кинигэ кыһатын генеральнай дириэктэрин солбуйааччы Валерий Луковцев уо.д.а. эҕэрдэлээтилэр.
Александра Очирова бэлитиичэскэй, судаарыстыбаннай үлэтиттэн быыс булан, айар үлэнэн утумнаахтык дьарыктанар. Кини хоһоон 12 хомуурунньугун, ол иһигэр үүнэр көлүөнэҕэ дойдуга тапталы иҥэрэр хоһооннор, 80-тан тахса ырыа ааптара. Кини ырыалара Лариса Долина, Эдита Пьеха, Рената Ибрагимов, Ларисы Трухина уо.д.а артыыстар репертуарларыгар киирбиттэрэ.
Николай Лугинов судаарыстыбаннай уонна айар-тутар, суруйар-бичийэр үлэни дьүөрэлээһин олус сэдэх көстүү буоларын бэлиэтээн эттэ. Ол да курдук, бэйиэт хоһоонноро баай ис хоһооннорунан, этэр санаата дириҥинэн уратылаахтар.
Александра Васильевна: «… Мин тугунан тыынарбынан суруйабын. Мин хоһооннорум -– миигин долгутар санааларым. Киһи аймах барыта биир дьиэ кэргэн курдук бииргэ буолуохтарын баҕарабын. Мин аан дойду уопсастыбата ЮНЕСКО үлэтигэр болҕомтолорун ууралларыгар кыһаллабын», -– диэтэ.
Айар биэчэр кыттыылаахтара хоһоон хонуутугар киирэн ыллылар. Ыалдьыт хомоҕой хоһооннорун Б.Ойуунускай аатынан Саха академическай тыйаатырын артыыстара уонна Александра Очирова бэйэтэ аахта. Кэлбит ыалдьыттарга илии баттааһыннаах кинигэлэрин бэлэх уунна.
Биһиги өрөспүүбүлүкэбитигэр биирдэ кэлбит дьон Саха сирин сөбүлээн, өссө сиһилии билсээри иккистээн-үһүстээн кэлэллэрэ — баар суол. Көрсүһүүгэ кыттыбыт култуура уонна духуобунай сайдыы миниистирин солбуйааччы Марина Силина Александра Васильевнаны 2022 сылга САССР 100 сылын бырааһынньыктааһын чэрчитинэн ыытыллыахтаах ЮНЕСКО уһулуччу айымньыларын кытта көрсүһүүгэ ыҥырда.
Надежда ЕГОРОВА, «Саха сирэ», edersaas.ru