Бүгүн, балаҕан ыйын 23 күнүгэр, Дьокуускай куоракка дойдуга бэриниилээх буолуу сүлүөтүн чэрчитинэн, эдэр армеестар кииннэрин астылар. Бэлиэтээн эттэххэ, бу киин эрдэҕэс саастаах оҕолор кииннэрин сүнньүнэн Клара Цеткин уулусса 14/3 аадырыска баар буолла.
Тэрээһиҥҥэ СӨ ыччат дьыалаларын уонна социальнай коммуникация миниистирэ Петр Шамаев, Дьокуускай куорат дууматын бэрэссэдээтэлин эбээһинэһин толорооччу Евдокия Евсикова, Дьокуускай куорат баһылыгын солбуйааччы Руслан Тимофеев, Ил Түмэн дьокутааттара Марина Силкина, Иван Данилов, Дьокуускай куорат үөрэх управлениетын салайааччы Мария Петрова, ЮНАРМИЯ эдэр армеецтар бүтүн Арассыыйатааҕы байыаннай-патриотическай хамсааһыннарын Уһук Илиҥҥи уокурукка сүрүн ыстаабын бэрэстэбиитэлэ Дмитрий Зыбалов, СӨ ЮНАРМИЯ хамсааһынын бүтүн Арассыыйатааҕы байыаннай-патриотическай хамсааһын эрэгийиэннээҕи ыстаабын салайааччы Александр Кузьмин о.д.а. кыттыыны ыллылар.
Бу күн тэрээһин иннинэ киин үһүс этээһигэр икки кэбиниэти көрдөрдүлэр. Манна киирбитим, байыаннай таҥастаах оҕолор автомат саа хомуйа, сыал кыҥыы олороллор. Иккис кэбиниэккэ остуол ахсын көмпүүтэрдэр, истиэнэҕэ улахан экран ыйаммыт.
Бастакы кэбиниэккэ Ыччат миниистирэ Петр Шамаев бириэмэҕэ аптамаат сааны хомуйда уонна тэрээһин туһунан санаатын үллэһиннэ:
— Бу бырайыак оҥоһулла сатаабыта ыраатта. Биһиги Дьокуускайбытыгар киин аһыллыбыта үөрүүлээх түгэнинэн буолар. Маннык кииннэр хас биирдии улууска баар буоллаллар. Оҕолору, ыччаты дойдуга бэриниилээх гына иитэр биһиэхэ күүскэ барыан наада. Ыччаты кытта аһҕастык кэпсэтиэххэ, үлэлэһиэххэ. Оскуола, уһуйаан саастан оҕоҕо төрөөбүт дойдуга тапталы иҥэриэхтээхпит уонна иитиэхтээхпит. Маннык иитии дьиэ кэргэнтэн, оскуолаттан саҕыллар. Ол байыаннай эпэрээссийэҕэ эрэ сыһыаннаан буолбакка, холобур, киһи хайдах от охсоруттан, сылгы, сүөһү көрөрүттэн, үлэни-хамнаһы толороруттан саҕаланар буоллаҕа.
Ульяна ЗАХАРОВА.
Ааптар хаартыскаларга түһэриилэрэ.