Ааспыт сыл алтынньы 26 күнэ эдэркээн спортсмен Юлиан Юмшанов олоҕор охсуулаах буолбута. Өрөспүүбүлүкэҕэ биллэр тустуук, кэскиллээх спортсмен олоҕо барыта иннигэр этэ.
Юлиан ХИФУ физкултуураҕа институтун бүтэрэн баран, ытык иэһин төлүү аармыйаҕа барбыта. Аармыйаттан кэлэн баран харчылаһар сыалтан дуогабара суох тутууга “Дуолан строй” тэрилтэҕэ үлэҕэ киирбитэ. Маяковскай аатынан уулуссаҕа дьиэ тутуутугар кырыыһаны өрөмүөннүү сылдьан үөһээттэн сууллан, улахан эчэйии ылан атаҕа суох хаалбыт.
Эдэр киһини кытта төлөпүөн нөҥүө кэпсэттим. «Дьылҕа Хаан ыйааҕа буолбатах, бу барыта оһолтон таҕыста. Мин баһаарынай буолар баҕа санаалааҕым» диэни киһи уйадыйа истэр.
— “Дуолан строй” диэн тэрилтэҕэ болуотунньугунан үлэлии киирбитим. Тутууга оробуочайынан үлэҕэ киирэргэ ханнык да дуогабар түһэрсиллибэт. Ол иһин тэрилтэ генеральнай дириэктэрэ Павел Емельяновтыын аҥардас кэпсэтии эрэ нөҥүө үлэҕэ киирбитим. Дьиэ кырыыһатын өрөмүөннээбиппит. Сэрэхтээх буолуу тиэхиньикэтин туһунан кэпсэтии суоҕа. Үлэбитин түмүктээбит күммүтүгэр Сайсары уокуругун баһылыга Леонид Бястинов кэлэн үлэбитин бэрэбиэркэлиэхтээх этэ. Үлэбитин көрөн баран вентиляционнай шаахта уонна кырыыһа икки ардыгар баар хайаҕаһы герметигинэн бүөлүүрбүтүгэр сордуахтаабыта. Уокурук баһылыга барбытын кэнниттэн мин Алексей Слепцовтуун кырыыһаҕа тахсыбыппыт. Ол сылдьан мин халтарыйан дуу, хайдах дуу охтубутум…Куоматтан уһуктан сыттахпына, «Дуолан строй» тэрилтэ салайааччылара балыыһаҕа кэлэ сылдьыбыттара, өйүөхпүт, биллээр диэбиттэрэ. Ол кэнниттэн тиэрэ хайыһыахтара дии санаабатаҕым.., — диэн Юлиан кэпсиир.
Сайдыылаах аныгы олоххо тоҕо маннык буоларый! Эдэр киһини күүстээх-уохтаах эрдэҕинэ үлэлэтэн баран, инбэлиит буолбутун кэнниттэн тиэрэ хайыһар хаһан да киһи сиэригэр батан сылдьыбатаҕа. Дуогабара суох үлэҕэ ылыы, сэрэхтээх буолууга илии баттаппакка эрэ, уокурук салайааччытын иннигэр отчуоттуурга эдэр дьону үөһээ таһааран итэҕэһи көннөттөрүү — сокуону кэһии.
Юлиан Юмшанов кырдьыгын буларыгар бар дьон, норуот өйөбүлэ наада. Ким баҕарар манныкка түбэһиэн сөп.
Билигин бу дьыала тула суут саҥаттаан тэриллэн эрэр эбит. Онон Юлиан кырдьыгын буларыгар баҕарабыт.
Ульяна ЗАХАРОВА, edersaas.ru
Хаартыскалар — Юлиан Юмшанов архыыбыттан.