Ытык ыам ыйынан! Эһигини барыгытын Айыы Тойон Таҥара уонна Дойду иччитэ Аан Алахчын Хотун салайар саха Саҥа сылын, Саха төрөөбүт күнүн, дьылы тахсан күөххэ үктэниини, Сайылык күнүн бэлиэтээн сыл бастакы Ыһыаҕын ыһар Ытык ыам ыйынан итии, истиҥ эҕэрдэ буоллун!
Саха омукка итинник сүдү, бэлиэ ыйы, улахан суолта биэрэн, Айыы Тойон Таҥара бэйэтинэн Дойдубут Иччитэ Аан Алахчын Хотуну кытары кыттыһан салайаллара биһиэхэ ордук үөрүүлээх уонна үрдүк эппиэтинэстээх.
Быйыл ыам ыйа сөрүүн, өрүс мууһа бардаҕына, 22-с кэнниттэн, арыый сылыйыаҕа. Ол гынан баран айылҕа айылгытын быһыытынан бэйэтин кэмигэр тиллиэҕэ, тыллыаҕа. Саамай үөрүүлээх таптал, эрэл, дьол аргыстаах сибэккинэн симэммит ыам ыйа түмүктэниэҕэ.
Таҥарианство итэҕэлин быһыытынан Иэйиэхсит Хотун Тиэргэнэй Тойону кытта кыттыһан бэс ыйын салайыахтара.
Быйыл үгэс быһыытынан ыам ыйын бүтэһик быыһык күнүгэр, 28 чыыһылаҕа, Айыы Таҥара төрөөбүт күнүн, айылҕа уһуктуутун Саха Саҥа сылын, Саха Төрөөбүт күнүн бэлиэтиир Ыһыах ыһар былааннаахпыт. Онно уруккутун курдук Айыы Таҥараҕа сүгүрүйээччилэр мустан өрөгөйдөөх саха бастакы Ыһыаҕын ыһыахпыт.
Дьиҥинэн ити күн араас хайысхалаах итэҕэл дьоно мустан, сирэй-харах көрсөн, атах тэпсэн олорон кэпсэтэрэ, сүбэлэһэрэ тоҕоостоох уонна кэскиллээх буолуо этэ.
Үүммүт ыйга бары чэгиэн-чэбдик, дьоллоох-соргулаах буолуҥ! Тускуо!
Гавриил Спиридонович Угаров – Эһээ Дьыл,
биология билимин дуоктара, ХИФУ бэрэпиэссэрэ, суруйааччы.
Хаартыска: ЯСИА архыыбыттан