Олоҥхо ыһыаҕар Кыыллаах нэһилиэгин түһүлгэтэ биир кэрэ көстүүлээҕинэн биһирэннэ. Манна Кыыллаах устуоруйата уонна аныгы кэм, мас уустарын, көмүс тарбахтаах иистэнньэҥнэрин үлэлэрэ, араас сахалыы аһылык – барыта ыалдьыттар көрүүлэригэр турда.
— Бырааһынньык киэҥ сураҕырар гына табылынна, үгэс тутуһулунна, аан бастакытын күн тахсыы сиэрин-туомун ыйыллыбыт күнүгэр ыыттыбыт, — диэн Кыыллаах нэһилиэгин олохтоохторо, эдьиийдии-балыс Вера Семеновна Николаева, Надежда Семеновна Прокопьева санааларын үллэстэллэр, — биһиги Чурапчы улууһун дэлэгээссийэтин көрүстүбүт, эдэр худуоһунньук Маша Максимова хартыынатын бэлэх ууннубут, биэ кымыһынан, хатыҥ уутунан күндүлээтибит.
Биһиги ыһыах үөрүүлээх аһыллыытыгар кытынныбыт, эрэпэтииссийэҕэ сырыттыбыт, тырааныспар үчүгэйдик үлэлээтэ. Бырааһынньык ыытыллар сирэ ырааһын биһирээтибит, тахсан киирэр сир тиийэр, илии суунарга уу баар, волонтердар бэркэ үлэлээтилэр.
“Иэйии” ырыа ансаамбыла суон сурахтаах Арыыбыт туһунан ырыаны толордо, “Күбэйэ” үҥкүү ансаамбыла ат сүүрдүүтүн аһыллыытын киэргэттэ, манна ыытааччынан нэһилиэкпит дьоно Лена Егоровна Данилова, Андрей Латышев буоллулар. Кыыллаахтар аттара “Өлүөхүмэ дербитэ” уонна “Стайерскай” саамай дьоһуннаах сүүрүүлэргэ бастаатылар. Кыыллаах нэһилиэгин баһылыга Раиса Еремеевна Лавернова аҕалаах уолу – Нарахаевтары аттарын күүскэ бэлэмнээбиттэрин уонна өрөспүүбүлүкэтээҕи Олоҥхо ыһыаҕар ситиһиилээхтик кыттыбыттарын иһин эҕэрдэлээтэ, харчынан бириэмийэни туттарда.
Олоҥхо ыһыаҕыттан олус үчүгэй өйдөбүл хаалла, дьон бары өрө көтөҕүлүүлээхтик сырытта, Дьокуускайтан, Покровскайтан, Томмоттон, Бэрдьигэстээхтэн, Амматтан, өрөспүүбүлүкэ о.д.а. улуустарыттан кэлбит оскуолаҕа бииргэ үөрэммит доҕотторбутун, биир дойдулаахтарбытын көрсөн үөрдүбүт-көттүбүт. Аанньаах Хочотун көстүүтүгэр элбэхтик хаартыскаҕа түстүбүт. Онон Олоҥхо ыһыаҕын уһун кэм устата өйдүү-саныы сылдьыахпыт.
Аны өлүөхүмэлэр улуус таһымнаах ыһыаҕы ыытар – Аанньаах Хочото курдук кэрэ-бэлиэ сирдэммититтэн үөрэбит. Бу ытык сири харыстыырбыт ирдэнэр, Өлүөхүмэ улууһун биир кэрэ көстүүлээх миэстэтинэн буоллун.
Валерий МАЛЫШЕВ, ааптар хаартыскаҕа түһэриилэрэ.