Өрөспүүбүлүкэбит күнүгэр Доҕордоһуу болуоссатыгар, олоҕурбут ньыманан дьиҥ сахалыы тыыннаах төрүт үҥкүү-оһуохай дьону бүттүүн түмэ тарта.
Манна саха норуотун фольклорун үөрэтэр, сэргиир, ытык-мааны дьоммут, өрөспүүбүлүкэҕэ киэҥник биллибит Дархан этээччилэрбит, тарҕатааччыларбыт, уһуйааччыларбыт төрүт үҥкүүбүтүн — оһуохайы оройуттан туттулар. Бу өрөгөйдөөх күҥҥэ аан бастакынан Алгыс тардыылаах оһуохайы бар дьонугар, эдэр ыччакка анаан, 92 саастаах ытык кырдьаҕас, Дархан этээччи Егор Михайлович Осипов саҕалаан, дьиҥнээх ис турукка киирэн, оһуордаах тылынан тута хоһуйан, балайда уһуннук эппитэ киэҥ сэҥээрини ылла, ураты болҕомтону тарта. Ону сиэтэ 86 саастаах Дархан этээччи Афанасий Егорович Алексеев үҥкүү тылын салгыы этэн дуораһытта.
Бу үтүө күҥҥэ аҕа саастаах ытык кырдьаҕастарбыт күн бүгүҥҥэ диэри норуот тылынан уус-уран айымньытын ураты көрүҥэ — оһуокай ис тыынын, тылын — өһүн, хамсаныытын эттэригэр-хааннарыгар иҥэринэн, өйдөрүгэр-санааларыгар илдьэ сылдьаллара үтүөҕэ-кэрэҕэ угуйар. Ол эбэтэр норуот төрүт үҥкүүтэ — Оһуохай ураты суолталааҕын, киһи этигэр-хааныгар, ис туругар, доруобуйатыгар дьайар, киһини эмтиир күүстээҕин, норуоту түмэр ураты суолталааҕын кэрэһэлиир. Эдэрдиин-эмэнниин, дьахтардыын, эр дьоннуун Өрөспүүбүлүкэбит күнүгэр анаммыт оһуохайбыт икки чаас устата тохтообокко салҕанан бара турбута оһуохай саха таптыыр, ытыктыыр үҥкүүтэ буоларын өссө төгүл чопчулуур.Үгүс-элбэх дьон-сэргэ түмсэн биир турукка киирэн, астына-дуоһуйа үнкүүлээтилэр, дьэ кырдьык даҕаны дьиҥнээх оһуохай бу буолар дэһэн кэпсэтэллэрэ, махтаналлара элбэххэ эрэннэрэр.
Саҥа тэриллибит Өрөспүүбүлүкэтээҕи Оһуокай Ассоциацията бу курдук өрөспүүбүлүкэҕэ баар бары улуустааҕы, куораттааҕы оһуохай түмсүүлэрин иилээн-саҕалаан биир сиргэ кииннээн үлэтин саҕалаабыта, норуоппут инники сайдыытыгар, кэлэр кэнчээри ыччакка сөптөөхтүк тиэрдиигэ туһуламмыта хайҕаллаах. Саха Өрөспүүбүлүкэтин култуураҕа уонна духуобунай сайдыыга миниистирэ Владимир Тихонов бу саҥа тэриллибит Өрөспүүбүлүкэтээҕи Оһуокай Ассоциацията бастакы тэрээһинэ ситиһиилээхтик ааспытынан махтанан туран, норуоппут инники сайдыытын түстүүр, бүттүүн түмэр төрүт Оһуохайбыт үйэттэн үйэҕэ сүппэккэ, симэлийбэккэ сайда турарыгар биир сомоҕо күүс буоларбыт биһиги ытык иэспит диэн бэлиэтээтэ.
Култуура министиэристибэтин пресс-киинэ.
[vc_video link=»https://www.youtube.com/watch?v=hj4m4qgBYq4&ab_channel=%D0%AD%D0%B4%D1%8D%D1%80%D0%A1%D0%B0%D0%B0%D1%81″]