ССРС норуодунай учуутала, РСФСР үтүөлээх учуутала Михаил Алексеев төрөөбүтэ 105 сылынан СӨ Ил Дархана Айсен Николаев бэйэтин «телеграм-ханаалыгар» суруйбут:
— Мин оҕо эрдэхпиттэн Михаил Андреевич холобуругар иитиллэн улааппытым. Кини олоҕо – идэҕэ бэринии уонна оҕолорго муҥура суох таптал буолар. Билиҥҥэ диэри киһи сөҕөр, хайдах ааспыт үйэ 60-c сылларыгар кини Үөһээ Бүлүү оройуонугар инникини өтө көрөн аныгы кэм оскуолатын төрүттээбитин. Туочунай наукаҕа, тиэхиньикэҕэ саха оҕолорун уһуйан хас да көлүөнэ оҕолорго аартыгы арыйбыта. Кини үөрэппит, уһуйбут оҕолоро күн бүгүнүгэр диэри идэлэригэр бэриниилээх үлэһиттэр буолан кини идэтин салҕыыллар.
Саха сирэ киэн туттар уонна өрүү улуу киһини өйдүү сылдьыаҕа. Кини үлэҕэ сыһыана, эрэлэ, таптала биһиэхэ барыбытыгар холобур эрэ буолуоҕа, — диэн суруйбут.
Бэлиэтээн эттэххэ, бу үтүө күҥҥэ Өрөспүүбүлүкэтээҕи лиссиэйгэ бастыҥ үөрэнээччилэри бэлиэтиир тэрээһин ыытыллыахтаах. Ону сэргэ, күнүс СӨ Ил Дархана, оскуола кэлэктиибэ, оҕолоро ытык киһи пааматынньыгар сибэкки дьөрбөтүн уурдулар.
Ульяна ЗАХАРОВА.