Таатта улууһугар хоруона хамсыгын бохсор хамыһыйа иһитиннэриитинэн, улууска алтынньы 14 күнүгэр, ковидтан эмтэнэр киһи ахсаана — 145, 10 киһи үтүөрбүт, суукка иһигэр 5 киһи дьаҥҥа хаптарбыта бэлиэтэммит.
—Коронавирус тарҕаныытын тохтотор туһуттан, улууска алтынньы 12 күнүттэн 26 күнүгэр диэри үөрэх тэрилтэлэрэ дистанционнайга көстүлэр. Дьиэттэн олорон үөрэх саҕаланна, оскуолалар, улуустааҕы үөрэх управлениета хонтуруолу тутан олороллор. Уһуйааннарга дьуһуурунай бөлөхтөр тэрилиннилэр. Бүддьүөт тэрилтэлэрин үксүлэрэ эмиэ ыраахтан олорон үлэҕэ көстүлэр.
Суһал ыстаап уонна улуустааҕы административнай хамыыһыйа кыттыгас эриэйдэлэрэ тиһиктээхтик салҕаналлар. Ытык Күөлгэ бэрэбиэркэлэр атыы-эргиэн дьиэлэринэн, тэрилтэлэринэн, оҕолор мустуон сөптөөх сирдэринэн күн ахсын оҥоһуллаллар. Эриэйдэҕэ оскуолалар кэннилэриттэн, сокуоннай саастарын туола илик оҕолор дьыалаларын көрөр хамыыһыйа (КДН) сотрудниктара, бу нэдиэлэ устатыгар административнай хамыыһыйаны кытта суһал ыстаап таҕыстылар. Ирдэбиллэр, хааччахтанан олоруу, мааскалаах сылдьыы тутуһуллар. Оттон нэһилиэк дьаһалталарыгар бэрэбиэркэлэри күн аайы оҥороллоругар сорук туруоруллубута. Итини сэргэ, баһылыктарга дьону-сэргэни эминэн-томунан хааччыйыыга уонна аптека быстыбакка үлэлиирин ситиһэргэ миэрэлэри ылалларыгар рекомендация оҥоһулунна.
Волонтердар Уус Тааттаҕа, Ытык Күөлгэ, Харбалаахха күүскэ үлэлииллэр. Онтон атын нэһилиэктэргэ аҕам саастаахтары көрөр-истэр социальнай үлэһиттэр наадалаах малларын-салларын, эмтэрин-томторун таһаллар, сорох нэһилиэктэргэ дьаһалталар хааччыйаллар, — диэн улуустааҕы суһал ыстааптан иһитиннэрдилэр.