Ыам ыйын 8 күнүн сарсыардатыттан бырааһынньыктыы киэргэммит улахан массыына аалай кыһыл былааҕы тэлимнэтэ, үөрдэ-көтүтэ, сүргэ көтөҕө ытык дьоммут тэлгэһэлэрин таһыгар тиийэн, эйэҕэс эҕэрдэни, аламаҕай алгыһы утары уунна.
edersaas.ru
Дойдуга буола турар быһыы-майгы ордук саастаах, ытык дьоммут алтыһыытын лаппа аҕыйатта, көрсүһүүтүн олоччу да сотто. Дьэ, маннык ыарахан балаһыанньа кэмигэр ытык дьоммут санааларын көтөҕөрдүү сананан, ырыа-тойук кэһиилээх, эйэҕэс- сайаҕас эҕэрдэ тыллардаах, өттүк харалаах, илии тутуурдаах, Хатас олохтоох дьаһалта уонна «Тускул» Култуура киинин үлэһиттэрин хамаандата Петр Петрович Никифоров суоппардаах тиийдилэр. Барыта 17 аадырыска сылдьан, ытык дьоммут (сэрии, тыыл бэтэрээннэрэ) ыллыктаах тылларын иһиттилэр, махталларын ыллылар, дьол түгэнин биллэрдилэр. Ону сэргэ, уонунан ырыа ылланна, соччо хоһоон этилиннэ.
Үөрүү көтөллөөх хамаандаҕа кимнээх баалларый?
Нэһилиэкпит дьаһалтатын салайааччы Евгений Петрович Пермяков, нэһилиэнньэни кытта үлэҕэ эппиэтинэстээх Харитонова Светлана Иннокентьевна, «Тускултан» Вилена Михайловна Константинова, Колымана Васильевна Ларионова, Алексей Владимирович Иванов, Татьяна Григорьевна Окорокова уонна Петр Петрович Никифоров.
«Саха сирэ», edersaas.ru сайтка анаан Наталья РУФОВА
Хатас