“Саха сирэ» хаһыат Улуу Кыайыы 70 сыллаах үбүлүөйүгэр “Бар дьонум кыһамньылара миэхэ күүс укпута» диэн эбэм Феврония Николаевна Малгина туһунан суруйбут ыстатыйабын таһаарбыта.
Ону тэҥэ, 2015 сыллаахха Улуу Кыайыы үбүлүөйүнэн сибээстээн “Үүнэр көлүөнэ тыйаатыра” Аҕа дойду Улуу сэриитигэр 5 төрөппүт уолун сүтэрбит Ф.Н. Малгина туһунан Иван Иннокентьевич Егоров «Хобороос» драматическай поэматынан “Ытык Ийэ” диэн испэктээги туруорбута. Испэктээк уус-уран салайааччыта РФ култууратын үтүөлээх үлэһитэ, СӨ норуодунай артыыһа Алексей Павлов, тыйаатыр режиссера Валентина Якимец. Хобороос оруолун СӨ үтүөлээх артыыската Мария Данилова толорбута.
Испэктээк кэнниттэн СӨ култууратын миниистирэ Владимир Тихонов, Бүтүн Арассыыйатааҕы ийэлэр уопсастыбаларын Саха сиригэр салайааччыта Прасковья Борисова, өрөспүүбүлүкэ бэтэрээннэрин сэбиэтин бэрэссэдээтэлэ Будимир Слепцов, “Бичик” кинигэ кылаабынай эрэдээктэрэ Валерий Луковцев, Таатта, Баайаҕа түмсүү салайааччыта Иннокентий Андросов эҕэрдэлээбиттэрэ.
Мин эбэм уолаттарын туһунан кэпсиирин истэн улааппыт буолан, ахтыы оҥорбутум.
“Ытык Ийэ” испэктээги туруорбут Үүнэр көлүөнэ тыйаатырын кэлэктиибигэр, туруорааччы режиссер Валентина Якимецка, Хобороос оруолун толорбут Мария Даниловаҕа, уолаттар оруолларын толорбут Арктика институтун устудьуоннарыгар Алдан Готовцевка, Никита Соловьевка, Эрхан Нохоевка, Антон Ботаковка, Саха тыйаатырын артыыһыгар Дмитрий Баишевка, “Саха” НКИХ тэлэбиидэнньэтигэр, араадьыйатыгар, “Саха сирэ” хаһыат эрэдээксийэтигэр Улуу Кыайыы 73 сыла туолбутунан эҕэрдэбин, махталбын тиэрдэбин.
Ф.Т.СТЕПАНОВА,
педагогическай үлэ бэтэрээнэ, РФ үөрэҕириитин туйгуна,
Ф.Н. Малгина сиэнэ.
Хаартыскалар: СИА, интэриниэттэн