Дьокуускай куорат аҕа баһылыга Евгений Григорьев Ил Дархан Айсен Николаевка бэйдиэ сылдьар ыттары булууга уонна тутууга суһал миэрэлэр тустарынан отчуоттаата.
— Бэҕэһээ Дьокуускайга буолбут дьиикэй түбэлтэ – дьиҥнээх трагедия. Ыттар саба түһүүлэриттэн ХИФУ учуонайа Сардаана Слепцова суорума суолланна. Сардаана Афанасьевна суох буолбута дьиэ кэргэнигэр уонна биһиэхэ барыбытыгар улахан иэдээн. ХИФУ ректора Анатолий Николаев бүгүн сарсыарда кини дьиэ кэргэнигэр көмө толору кээмэйинэн оҥоһуллуоҕун туһунан миэхэ эрийэн эттэ. Кыра уола үөрэнэригэр көмөлөһөр боппуруостар быһаарыллыахтара. Кини дьиэ кэргэнигэр кутурҕаммын тиэрдэбин, — диэн Айсен Сергеевич эттэ.
Евгений Григорьев эппитинэн, бэйдиэ сылдьар ыттары тутарга эбии 11 биригээдэ тэрилиннэ. Биригээдэлэр уопсай ахсааннара – 15, барыта 30 киһи үлэлиир. Биригээдэлэргэ уопуттаах кинологтар, анал үлэһиттэр киирдилэр.
Уокуруктар быраабаларыгар кэрийэн көрөр мобильнай бөлөхтөр тэриллэн, күнүстэри-түүннэри үлэлээн эрэллэр. Үлэһиттэр ханна ыттар үөрдээн сылдьалларын кэтээн көрөн, суһаллык биригээдэлэргэ биллэрэн иһиэхтэрэ. Ахсынньы 30 күнүгэр мэрия, быраабалар, тэрилтэлэр, суһал сулууспалар үлэһиттэрэ – барыта 170 киһи, 47 массыына үлэлииллэр.
Ил Дархан бырабыыталыстыа бастакы солуйааччыта Дмитрий Садовниковка бу боппуруоһу быһаарарга, үлэлэһэргэ соруйда. Куорат дьаһалтата киниэхэ балаһыанньаны суһаллык иһитиннэрэн иһэр буолуоҕа.
Айсен Николаев эппитинэн, бэйдиэ сылдьар ыттары көрөр-харайар пуун үлэтин үбүлээһин Уһук Илин эрэгийиэнигэр саамай үрдүк. Куорат дьаһалтата уонна уопсастыбаннас бу үп сөпкө туһанылларын кэтээн көрүөхтээхтэр. Ону тэҥэ, бэйдиэ сылдьар кыылларга туһааннаах сокуону уопсастыбаннас уонна эспиэрдэр ырытыһалларыгар ыҥырда. Манна Ил Түмэн уонна Госдуума дьокутааттарын оруоллара улахан.
Ангелина Васильева, “Саха сирэ” хаһыат, edersaas.ru