Олунньу 14 күнүгэр бэйдиэ ыттар сокуоннарыгар ханнык уларытыылары киллэриэххэ сөбүн туһунан РФ Судаарыстыбаннай Думатын төгүрүк остуола буолла. Төгүрүк остуолу Судаарыстыбаннай Дуума дьокутаата Владимир Бурматов иилээн-саҕалаан ыытта. Кэпсэтиигэ Федеральнай мунньахха дьокутааппыт Галина Данчикова, Дьокуускай аҕа баһылыга Евгений Григорьев уонна СӨ Аграрнай бэлиитикэ уонна тыа сирин сис кэмитиэтин бэрэссэдээтэлэ Андрей Находкин кыттыыны ыллылар.
Госдуума дьокутаата Галина Данчикова бэйдиэ сылдьар ыттар ахсааннары аҕыйатары, хайдах кинилэри тутары-хаайары регионнар бэйэлэрэ быһаардыннар диэн этиилээх. Аны федеральнай хааһынаттан ыттары приюттарын тутуугар харчы эмиэ барыахтааҕын тоһоҕолоото.
Куорат аҕа баһылыга Евгений Григорьев Дьокуускай куорат эрэ аатыттан буолбакка, сибиир уонна Уһук Илин куораттарын ассоциацияларын ааттарыттан кытынна.
Кини 498 №-дээх «Кыылга эппиэтинэстээх уонна амарах сыһыан” туһунан сокуон хараҕынан бэйдиэ сылдьар ыттары (ОСВВ) тутуу, ыраастааһын уонна көҥүл ыытыы туһунан сокуону миэстэтигэр толоруу кыһалҕатыгар уонна приюттарын тутуу ирдэбилин судургутары туруоруста.
— Биһиэхэ, Дьокуускайга, кыыллыйбыт ыттар үөрүнэн сылдьаллар. Интэриниэт ситимигэр тарҕанар видеоларга да көрдөххө, туох баар кыра ыттары барыларын улахан үөрдүспүт ыттар тутан сииллэр. Дьон тыыныгар турбут, кырыктыйбыт ыттары тоҕо биһиги иитиэхтээхпитий? Бу ыттар хаһан даҕаны дьиэтийбэттэр. Хайдах да иитэн аны кинилэр кыыллыйбыт майгыларын уларыппаппыт. Ыты килиэккэҕэ өр кэмҥэ хаайан турары мин амарах сыһыан дии санаабаппын, — диэтэ кини.
СӨ Ил Түмэнин аграрнай бэлиитикэҕэ уонна тыа сиригэр сис кэмитиэтин бэрэссэдээтэлэ Андрей Находкин куорат баһылыгын этиитин өйөөтө. Кини эбии кырыктаах ыттары «утутар” туһунан этиини көтөхтө:
— Биһиги тыйыс айылҕалаах усулуобуйабытыгар ыттар үөрдүһэн сылдьан дьон-сэргэ олоҕор кутталы үөскэтэллэр. Бэйдиэ сылдьар ыт уопсастыбаҕа улахан сэрэхтээх диэн өйдөбүлү киллэриэххэ наада. Өскөтүн, бэйдиэ сылдьар ыттар дьоҥҥо, сүөһүгэ-сылгыга саба түһэр буоллахтарына, эбэтэр улаханнык ыалдьыбыт буоллахтарына, ахсааннарын аччатар туһуттан сымнаҕастык «утутар” туһунан уларытыыны сокуоҥҥа киллэриэххэ сөп. – диэн санаатын эттэ.
Үгүс санаа этиллибитин кэннэ РФ Судаарыстыбаннай Думатын дьокутаата, оробуочай бэлэх салайааччыта Владимир Бурматов санаатын эттэ:
— Эрэгийиэннэр кыахтарыттан көрөн приюттарыгар төһө миэстэлээхтэринэн ыттары кырдьан өлүөхтэригэр диэри иитии уонна кыыллары көҥүл ыытыы оннунан хаалыахтаах. Ол эрээри айдаан тахсыбатын туһуттан оскуола, уһуйаан, оҕо былаһааккаларын таһыгар ыттары көҥүл ыыппат буолууну ситиһиэхтээхпит. Хас биирдии эрэгийиэн ыттаах хаһаайыттарга эппиэтинэһи сүктэрэн, ыстараап олохтоон, төрөөбөт-ууһаабат гына ыраастатар гына дьаһаналларыгар чэпчэтии өҥөлөрүн оҥорон сөптөөх үлэни тэрийиэхтээх. Биһиги дьону бэйдиэ сылдьар уонна хаһаайыннаах ыттартан көмүскүөхтээхпит, оттон кыыллар дьон-сэргэ кырыктаах сыһыаныттан эмиэ харыстабыллаах буолуохтаахтар.
Ульяна ЗАХАРОВА, «Саха сирэ» хаһыат