Ыттары Автодорожнайтан Очиченкоҕа көһөрөн эрэллэр

Бөлөххө киир:

Дьокуускай куоракка Автодорожнай уулусса 1/4 нүөмэригэр баар  быстах кэмҥэ тутар анал пуунтан ыттары  Очиченко уулусса 57-гэр баар бастайааннай аадырыстарыгар көһөрөн саҕалаатылар. Бу туһунан Дьокуускай куорат уокуругун пресс-сулууспата иһитиннэрэр.  Быстах кэмҥэ дьэллик ыттары тутар пууну кулун тутар саҥатыгар сабыахтара.

«Хас биирдии ыт анал бииркэлээҕин, чииптээҕин уонна уопсай туруктарын бэрэбиэркэлиибит. Салгыы  тустаах  докумуону оҥорон баран, ыттары баартыйаларынан  Очиченко уулуссаҕа баар анал пууҥҥа илдьэбит», — диэн  пресс-сулууспа иһитиннэрбит.

«Жилкомсервис» МУП иһитиннэрбитинэн, 197 ыт баарыттан Очиченко уулуссаҕа баар пууҥҥа 60-нун илдьибиттэр. Бу күннэргэ хаалбыт 137 ыт миэстэтин булларыахтара. Дьокуускай куораттааҕы хаһаайыстыбаны дьаһайар сулууспа начаалынньыга Дмитрий Захаров быһаарбытынан,  Очиченко уулуссаҕа баар анал пуун лаппа кэҥэтиллэн, 1000 ыт холкутук батар буолбут. Билиҥҥи туругунан,  онно 744 ыт баар. Эрдэтээҥи иһитиннэриинэн, Очиченкотааҕы пууну икки тыһыынча ыт киирэр кыахтаах гына кэҥэтиэхтээх уонна Автодорожнай уулуссатааҕы пууну сабыахтаах этилэрэ.

Александр Тарасов.

Хаартыска: Дьокуускай уокуругун пресс-сулууспата.

+1
0
+1
0
+1
0
+1
0
+1
0
+1
0
+1
0