Зоозащитниктар олунньу 8 күнүгэр Саха сириттэн 45 ыты таһаҕас массыынатыгар тиэйэн Бурятияҕа илпиттэрэ. Ону баара буряттар Дьокуускай ыттарын төттөрү утаараары сылдьаллар үһү.
Тивиком канал кэпсииринэн, ыттары тиэйэн испит фураны докумуона ситэтэ суох диэн Иволгинскай оройуон полицията тохтоппут. Суоппар уонна куратор ииримтийииттэн быһыыта суохтар диэн баайсыбыттар. Бэрэбиэркэлиэхтэригэр дылы массыына полиция дьиэтин таһыгар хас да чаас турбут. Ыттары тиэйэн аҕалааччы Елена Мордвина иһитиннэрбитинэн, массыынаны туоһулардаах арыйан көрбүттэр. Ыттар бары этэҥҥэ тиийбиттэр эбит.
«Остров добра” диэн аһымал пуонда салайааччыта Наргиз Муминова ыттар бары биркэлээхтэртин уонна стериализацияламмыттарын эмиэ туоһулаабыт. «Ыттар бары санитарнай киниискэлээхтэр, ииримтийиини утары быһыы ылбыттар», — диэн кини бэлиэтээбит.
Арыаллааччылар сорох ыттар килиэккэттэн тахсыбыттарыттан куттанан сатаан аһаппатахтар. Онон ыттары тутар анал биригээдэни көмөҕө ыҥырбыттар.
Бурятия ветеринариятын салайааччыта Эрдэм Сангадиев ыттар уон хонуктаах харантыыннарын болдьоҕо аастаҕына, дьон иитээри ылбатаҕына, Дьокуускайга төттөрү ыытыы боппуруоһун көрүөхпүт диэбит.
Матырыйааллары Тивиком-ТВ сайтан ыллыбыт.
Ульяна ЗАХАРОВА, «Саха сирэ», edersaas.ru