Дьокуускайга бэйдиэ сылдьар ыттар оҕоҕо саба түспүттэрин туһунан социальнай ситимҥэ тарҕанна. Бу быһылаан эмиэ АГАТУ, урукку Тыа хаһаайыстыбатын академиятын оройуонугар буолбут.
Соторутааҕыта бу оройуоҥҥа бэйдиэ сылдьар ыттар дьахтарга саба түспүттэрин видеота тарҕаммыта. Ол кэннэ айдаан тахсан «Помоги выжить» диэн ыттары тутар аһымал пуонда пуунун үлэһиттэрэ бу оройуонтан ыттары тутан илдьибиттэрэ.
Бүгүн бу кыыллары тутар пуун дириэктэрин Екатерина Безрученколыын кэпсэттибит:
— Бу ахсынньы ыйга уопсайа биһиги үлэһиттэрбит уонна Якутдорстрой тэрилтэ үлэһиттэрэ буолан, 441 ыты туттубут. Ыттары тутан баран пууҥҥа аҕалан уон күн харантыыҥҥа олордобут. Ол кэнниттэн биирдэ ууһаабат гына ыраастыыбыт. Аттыыбыт уонна бииркэлиибит. Ааспыт нэдиэлэҕэ ыттар дьылҕаларын быһаарар сугулаан буолбута. Ол эрээри сокуон утары куорат дьаһалтата тугу да гынар кыаҕа суох. Ыттары көмүскүүр сокуон бүтүн Арассыыйа үрдүнэн үлэлии турар. Онон уруккубут курдук сайаапка киирдэҕинэ тутабыт, ыраастыыбыт, вакциналаан баран төттөрү ыытабыт. Оттон ити АГАТУ оройуонун ыттарын туһунан этэр буоллахха, ити аттары тутар ипподромҥа уруккуттан ыттар бааллар, кинилэри онно аһаталлар. Хаһаайыттар эппиэтинэһэ суохтарыттан бэйдиэ ыт ахсаана элбии турар. Ыттарын ыраастаппаттар. Таах босхо ыытан кэбиһэллэр. Ыттара төрөөтөҕүнэ оҕолорун хоруопкаҕа уган баран бырааҕаттыыллар.
Куораппытыгар ыттар, аттар бэйдиэ сылдьаллар. Оҕолорбут туһугар куттана-куттана туманы быыһынан оптобус тохтобулугар тахсарын түннүгүнэн маныыр төрөппүттэр элбэхтэр. Оттон киэһэтин ыттар саба түспэтэллэр ханнык диэн оҕолорун туһугар долгуйа төлөпүөнү сыҥаахтарыттан араарбаттар. Ыттары сокуон көмүскүүр, оттон биһигини ким?
Ульяна ЗАХАРОВА.