Госдуумаҕа дьиэ кыылларын иитиигэ эппиэтинэһи үрдэтэргэ туруорсаллар. Экологияҕа кэмитиэт бэрэссэдээтэлин солбуйааччы Владимир Бурматов КоАП-ка көннөрүүлэри киллэрэр туһунан туруорсар. Ол курдук, дьиэ кыылын бырахпыт дьону 30 тыһыынча солкуобайга, ыттар дьону ытырдахтарына, 200 тыһыынча солкуобайга ыстарааптыырга этии киллэрдэ.
Кини этэринэн, бу көннөрүүлэр федеральнай уорганнары кытары сөбүлэһиннэриллэн тураллар, Госдуума ылынарыгар бэрт кыра хаалбыт.
— Ыты босхо ыытан кэбиһии – бу куораттар, сэлиэнньэлэр улахан кыһалҕалара, мантан сылтаан ыттар бэйэлэрэ төрөөн-ууһаан, элбээн иһэллэр. Онон бэйдиэ сылдьар ыттар элбииллэр. Эрэгийиэннэр салалталарыгар ыты босхо ыытан кэбиһэр хаһаайыттарга миэрэ ылалларын курдук эбии боломуочуйа биэриэххэ наада, — диэн кини эттэ.
Санатар буоллахха, бу иннинэ өрөспүүбүүкэбитигэр ыам ыйын 17 күнүттэн хаһаайыттар ыттарын кэнниттэн хомуйбат буоллахтарына, ыстарааптанар буолбуттара. Ол курдук, хаһаайыннаах ыты босхо ыытыы иһин, ыт кэнниттэн хомуйбат буолуу иһин бастакы ыстараап 1,5 тыһыынча солкуобай, иккис түбэһиигэ 3-5 тыһыынча солкуобай буолар.
Ангелина Васильева, “Саха сирэ” хаһыат, edersaas.ru
Хаартыска: СИА.