Маны аах Экэниэмикэ

Ыт уонна куоска аһылыгын оҥорорго 50 млрд солкуобай ирдэнэр

Соторутааҕыта Арассыыйа бэрэсидьиэнэ Владимир Путин Мордовия баһылыгын Артем Здунову кытта көрсүһүүтүгэр ыт уонна куоска аһылыга үгүс ардыгар омук сириттэн кэлэрин туһунан кэпсэтии күөрэйбитэ. Владимир Владимирович маннык быһыыны-майгыны кытта сөпсөспөтүн биллэрбитэ.

Өрөспүүбүлүкэ баһылыга Здунов бу ырыынагы эрэгийиэҥҥэ собуоттары тутан омук импордердарыттан былдьыыр былааннаҕын, Мордовияттан Арассыыйа атын эрэгийиэннэригэр дьиэ кыылларын аһылыгынан хааччыйыахтарын сөбүн туһунан дакылааттаабыта. Дойду бэрэсидьиэнэ бу саҕалааһыны өйүүрүн биллэрбитэ.

Билигин ити көрсүһүү түмүгүнэн Зооиндустрия национальнай ассоциациятын бэрэстэбиитэллэрэ хоруй биэрдилэр. “Арассыыйа бу эйгэҕэ тас дойдулартан тутулуга суох буоларын туһугар сылга эбии 300 тыһыынча туонна аһылыгы оҥорон таһаарар кыахтаах 10 собуот тутуллуох тустаах”, — диэн ассоциацияҕа эппиттэр. Ити ортотунан 50 млрд. солк. үбүлээһини ирдиэн сөп.

“Тыа хаһаайыстыбатын уонна эргиэн министиэристибэлэригэр сүөһү аһын оҥорон таһаарыыга туһаайыллыбыт туспа бырагыраамалар таҥыллыбыттара. Ол эрэн онно дьиэ кыыллларын аһылыгын бырагыраамаларга таарыллыбатахтар. Куоскалаах ыты эмиэ умнубуттар”, – диир ассоциация салайааччыта Кирилл Дмитриев. Түмсүү актыбыыстара аналлаах министиэристибэлэргэ балаһыанньаны тупсарарга сөптөөх сокуоннары туруорсар былааннаахтар.

Дьиэ кыылларыгар анаммыт табаардар ырыынактарыгар 2021 сылга Арассыыйаҕа 318 млрд солкуобайга тэҥнэспит. Бу сөҕүмэр сууматтан 85% дьиэ кыылын аһатарга бараммыт.

 

 

0
0
Telegram @edersaas20