Дмитрий Давыдов уонна Степан Бураншев режиссердаах «Ыт» киинэ Арассыыйа үрдүнэн онлайн киинэ тыйаатырдарга көстүөҕэ. Онон киинэҕэ нууччалыы дубляж оҥоһуллуоҕа.
— Киинэни былырыын Аммаҕа уһулбуппут. Манна 7 кыра түбэлтэни көрдөрдүбүт. Барыта 70 артыыс оонньоото. Амма олохтоохторо, Саха тыйаатырын артыыстара оонньоотулар. Түбэлтэлэргэ тыа сиригэр буолбут киһи күлэр да, сонньуйар да устуоруйалара бааллар. Үс түбэлтэни Степан Бурнашев, үһү мин уонна биир устуоруйаны кыттыһан уһулбуппут. Манна диэн эттэххэ, бу түбэлтэлэргэ олоххо буолбут биир эрэ баар, атынын бэйэбит толкуйдаабыппыт, — диэн режиссер Дмитрий Давыдов Варшаватааҕы норуоттар икки ардыларынааҕы киинэ бэстибээлин түмүгүнэн ыытыллыбыт пресс-кэмпириэнсийэҕэ кэпсээтэ.
Санатан суруйдахха, бэстибээлгэ саха киинэтэ «За ясный взгляд на обыденную человеческую жизнь» диэн дьүүллүүр сүбэ анал бирииһин уонна NETPAC түмсүү дьупулуомун ылары ситиспитэ.
«Ыт» киинэ киинэ тыйаатырдарыгар прокакка көстүбэтэ буолуо. Арассыыйаҕа дьаҥ балаһыанньата уустугунан, кыра прокаты эбэтэр чөкө соҕустук тэрийэн, биирдэ-иккитэ көрдөрүөхпүт диэн былаанныыбыт. Дьокуускайы таһынан Москваҕа, Санкт-Петербурга көрдөрөөрү кэпсэтии ыыта сылдьабыт», — диэн Дмитрий Давыдов эбэн эттэ.
Денис Петров хаартыскалара.