Арыгы иһэн баран, халлаан хабарҕатынан, муора тобугунан буолбут биитэр аһара арыгылаан, «гэрээчкэлээбит» киһи буруйу оҥорон баран, онтун үксүгэр өйдөөбөт, туохтан сылтаан итинниккэ тиийбитин кыайан быһаарбат буолар эбит.
Ол курдук, СӨ ИДьМ-тын пресс-сулууспата иһитиннэрбитинэн, Муома улууһугар 46 саастаах киһи арыгылыы олорон, соччо билбэт 39 саастаах киһитин дьиэтигэр ыҥырбыт. Икки бытыылка буокка испиттэр.
Ол олорон, ыалдьыт ааттаах киһи туох да сылтаҕа суох кыыһыран-тымтан, хаһаайыны кырбаан киирэн барбыт. Онтон ыстакааны хаба тардан ылан алдьатан баран, ол үлтүркэйинэн бу эрэйдээҕи уҥа хараҕын дэҥнээбит.
Итиччэлээхэй айдааны, ыһыыны-хаһыыны истэн, ыаллара полицияны ыҥыран, эмсэҕэлээбит киһини өссө улахан содултан быыһаабыттар.
Оттон Мэҥэ Хаҥалас улууһугар аҕас-балыстыы дьахталлар арыгы иһэн баран, 61 саастаах киһиэхэ дьиэтигэр тиийбиттэр. Онтулара урут киһини өлөрөн сууттана сылдьыбыт киһи эбит.
Дьиэлээх хаһаайын эмиэ итирик олорор эбит, киниэхэ биир бытыылка буоккалаах тиийбиттэр, онтуларын бииргэ иһиспиттэр. Ол кэнниттэн дьахталлартан биирдэстэрэ таһырдьа табаахтыы тахсыбыт.
Ол кэмҥэ дьиэҕэ хаалбыт дьахтар хаһаайынныын ардырҕаһан-кыыһырсан киирэн барбыттар. Онуоха эр киһи буолуохсут булт быһаҕын ылан, ыалдьытын көхсүгэ анньыбыт. Бааһырбыт дьахтар мүлчү туттаран, таһырдьа куотан тахсыбыт.
Бу икки түбэлтэҕэ эмсэҕэлээччилэргэ суһал көмө оҥоһуллан, тыыннаах хаалбыттар.
Бу чахчыларынан РФ Холуобунай кодексатын 111-с ыст. 2-с чааһынан, ол эбэтэр, доруобуйаҕа ыарахан эмсэҕэлээһини соруйан оҥоруу бэлиэтэ баарынан, холуобунай дьыала тэриллибит. Буруйдаахтар 10 сылга диэри болдьоххо көҥүллэрэ быһыллыан сөп.
Биһиги корр., «Саха сирэ» хаһыат, edersaas.ru
Хаартыска: интэриниэттэн