Ыстаадаларга оҕо сайыҥҥы сынньалаҥын тэрийиигэ көрүллэр субсидияны биэрии бэрээдэгэ уларыйда
Саха Өрөспүүбүлүкэтин бырабыыталыстыбатын биир уочараттаах сүбэ мунньаҕа муус устар 29 күнүгэр ыытыллыбыта.
edersaas.ru
Сүбэ мунньахха «Саха Өрөспүүбүлүкэтин бырабыыталыстыбатын 2019 сыл ыам ыйын 29 күнүгэр таһаарбыт 118№-дээх «Саха Өрөспүүбүлүкэтин судаарыстыбаннай бүддьүөтүттэн таба хаһаайыстыбаларыгар саастарын ситэ илик, 14-дүттэн 18-һыгар диэри саастаах, гражданнар сайыҥҥы сынньалаҥнарын тэрийиигэ субсидия көрүллүүтүн бэрээдэгин бигэргэтэр туһунан» уурааҕар кэккэ уларытыылары киллэрэр туһунан» диэн уураах бигэргэннэ. Онуоха сүрүн уларытыы бэриллэр субсидия көдьүүһүн үрдэтиигэ, үлэ көрдөрүүлэрин тупсарыыга туһуланна. Табаны иитэр хаһаайыстыбаларга саастарын ситэ илик гражданнар, оскуола үөрэнээччилэрин сайыҥҥы сынньалаҥнарын тэрийии 2018 сылтан Дьарыктаах буолуу судаарыстыбаннай кэмитиэтинэн үбүлэнэр. Бу харчыга тирэҕирэн, сыл ахсын 30 хаһаайыстыба табаһыт төрөппүттэригэр көмөлөһөн ыстаадаларга сайылыыр оскуола үрдүкү кылааһын үөрэнээччилэрин хамнаһынан хааччыйаллар. Ол түмүгэр, ааспыт икки сыл устатыгар ыстаадаларга 400-тэн тахса оҕо үлэлээтэ.
Быйыл «Саха Өрөспүүбүлүкэтин нэһилиэнньэтэ 2020-2024 сс. дьарыктаах буолуутугар көмөлөһүү» судаарыстыбаннай бырагырааманы олоххо киллэрии чэрчитинэн, быйыл өрөспүүбүлүкэ бүддьүөтүттэн 3 мөл. солк. көрүллэн, ыстаадаларга 185 оҕо үлэлиэҕэ.
Раиса Сибирякова, «Саха сирэ» хаһыат. edersaas.ru