СӨ Бырабыыталыстыбатын бэрэссэдээтэлин солбуйааччы Ольга Балабкина өрөспүүбүлүкэҕэ бүгүҥҥү күҥҥэ коронавирус туругун билиһиннэрдэ, туохха болҕомто ууруохха наадатын ыйда.
Биллэрин курдук, бүтэһик сууккаҕа 75 киһи ыарыйда. Итинтэн Дьокуускай куоракка – 61, Кэбээйигэ – 1, Ленскэйгэ – 2, Намҥа – 2, Нерюнгрига – 6, Сунтаарга – 2, Хаҥаласка – 1 киһи ыалдьыбыт.
Нам, Мэҥэ Хаҥалас улуустара ыарыыны кыайа туттулар уонна ыалдьыбыт киһи ахсаанын аҕыйаттылар диэн эрэнэрин эттэ. Ол да буоллар улууска аймахтарыгар сынньана барбыт оҕолор ыарыыны тарҕатыылара баарын ыйар. “Үгүстэр, өскөтүн, мантан коронавируһунан ыалдьыбат диэн ыспыраапка ыллахпытына, улууска доруобай оҕо кэлэрин мэктиэлиибит диэн өйдөбүллээхтэр. Хомойуох иһин оннук буолбатах, вирус түргэнник бэриллэр. Онон оҕо сайыҥҥы сынньалаҥар сибээстээх икки быраабыла баар. Төрөппүттэр аймахтара ыалдьыбаттарын туһугар оҕолорун улууска илдьибэттэр, эбэтэр төрөппүт көҥүлүнэн булгуччу медицинскэй учуокка туруораллар (улуустар таһымнарыгар бары усулуобуйа тэриллибитэ) итиэннэ медиктэр ыраахтан эбэтэр атын көрүҥүнэн оҕону 2 нэдиэлэ устата кэтээн көрөллөр”, — диэн эттэ.
Хоту улуустарга сайыҥҥы лааҕырдар Роспотребнадзор кытаанах быраабылатынан үлэлэрин саҕалаатылар диэн иһитиннэрдэ. Этэрээккэ 12 оҕоттон элбиэ суохтаах, биир территорияҕа тус-туспа сылдьыахтаахтар. “Быраабыла балачча кытаанах. Ол эрээри, бу барыта ыарыы оҕолор, үлэһиттэр ортолоругар тарҕамматын туһугар оҥоһуллар. Үлэһиттэр тахсыбаттар. Бородууктаны тиэрдиини, туох ирдэнэрин барытын хантаага суох (бесконтактный) ньыманан тиэрдэллэр”, — диэн иһитиннэрдэ.
Ольга Балабкина бөлөҕүнэн (корпоративнай) ыалдьыы түгэннэрэ тахса туралларын эттэ. Тэрилтэҕэ ыалдьыбыт, хантаактаах үлэһит баар буоллаҕына салайааччы дьиэҕэ олоруу эрэсиимигэр сөп түбэһэр быһаарыы ылыныахтааҕын бэлиэтиир. “Кэлэктиипкэ ыарыһах баара биллэр түгэнигэр, үлэ тохтоон хаалыахтаах диэн буолбатах. Роспотребнадзор быраабылатынан чинчийиллэр дьон кэккэтигэр киирээччилэр бааллар. Онон бииргэ чэйдииртэн туттунар, тэрилтэҕэ дьон киириитин-тахсыытын хааччахтыыр быраабыла тутуһуллуохтаах”, — диэн ыйар.
Онтон дьону кытта быһаччы алтыһар, үлэлэрин тохторор кыахтара суох тэрилтэлэргэ санитарнай ирдэбил тутуһуллуохтааҕын, сууйа-сото сылдьыллыахтааҕын, мааска кэтиллиэхтээҕин, социальнай дистанция тутуһуллуохтааҕын санатар.
Людмила ПОПОВА, “Саха сирэ” хаһыат, edersaas.ru