Аҕыйах хонуктааҕыта Биэнсийэ фондатын Саха сиринээҕи салаатын салайааччыта Георгий Степанов, улуустааҕы салайааччылар кыттыылаах үлэ тоҕус ыйдааҕы түмүгүн таһаарар мунньах буолан ааспыта.
“Саха сирэ” хаһыат, edersaas.ru
Мунньах кэмигэр нэһилиэнньэ биир боппуруоска болҕомтотун ууруон наадатын иһитиннэрбиттэрэ. Ол курдук, олус элбэх киһи биэнсийэ кээмэйин, көрүллэр харчы болдьоҕун, страховой ыстаас, о.д.а. ыспыраапканы ылаары, биэнсийэ фондатыгар тиийэллэр эбит.
“РФ судаарыстыбаннай өҥөнү оҥоруу туһунан” сокуоҥҥа олоҕуран, ханнык баҕарар судаарыстыбаннай эбэтэр муниципальнай тэрилтэҕэ баар сибидиэнньэни биэдэмистибэлэр икки ардыларынааҕы электроннай систиэмэ (Система межведомственного электронного взаимодействия) нөҥүө ылыахтарын сөп”, — диэн Георгий Степанов эттэ. Судургутук быһаардахха, судаарыстыбаннай эбэтэр муниципальнай тэрилтэ иккис тэрилтэҕэ баар докумуону, дьону бэйэтин сүүрдүбэккэ, ирдэбил сурук (запрос) ыыппакка, миэстэтигэр олорон көрүөн сөп эбит.
Быйылгы сыл 9 ыйынааҕы түмгүнэн, Дьокуускай куораттааҕы килийиэннэр сулууспаларыгар тиийбит дьонтон 40 бырыһыана ыспыраапка ирдэһээччи эбит. Ол эбэтэр, тэрилтэ салайааччылара билбэттэриттэн дуу, бириэмэлэрин харыстаан дуу, дьону бэйэтин ыспыраапка ыла ыыталлар эбит. Дьиҥэр, аныгы үйэҕэ, технология сайдыбыт кэмигэр, дьон дьиэттэн тахсыбакка, ханнык баҕарар өҥөнөн туһаныан сөп эбээт.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн