Социальнай ситиминэн быһа сибээскэ Ил Дархаҥҥа «Ырыынактар тоҕо харантыыҥҥа сабыллыбаттарый?» диэн ыйыттылар.
Маныаха, «Уон киһи ыарыйдаҕына сабаҕыт. Билигин 100 киһи ыалдьар да, тоҕо сабан кэбиспэккитий» диэн хабааннаах ыйытыылар киирэллэр диэтэ Ил Дархан уонна маннык быһаарыыны биэрдэ:
—Өйдүүргүт буолуо, саас бу коронавирус дьаҥын хайдах эмтииргэ, дьаҥ тарҕаныытын мэхэньиисимин быһаара охсорго, элбэх киһи дьаҥҥа хаптарыытын бохсорго бэлэмэ суох этибит. Доруобуйа харыстабылын систиэмэтэ эмиэ. Кылаабынайа элбэх киһи ыалдьыбатын туһугар сорук туруоруллубута. Саас бастаан дьаҥ туруутугар 300 куойка миэстэ баар буоллаҕына, эбиллэн, икки тыһыынчаттан тахсан турар. Быраастар ковиды утары охсуһа, дьаҥы түргэнник быһаара үөрэннилэр. Аан бастаан күҥҥэ 500 анаалыс оҥоһулларын элбэх диир этибит. Билигин алта аҥаар тыһыынчаҕа тиийэ оҥоһуллар буолла.
Билигин урбаанньыттар бу сааскыттан ханнык миэрэлэри тутуһуохтаахтарын эмиэ үчүгэйдик билэллэр. Маасканы кэтиини, бэрчээккилээх сылдьыыны, дезинфекцияны оҥорууну, бэйэ икки ардыгар дистанцияны тутуһууну. Ирдэбили тутуһалларыгар, эппиэтинэстээхтик сыһыаннаспыттарыгар махтанабын. Онон билигин экэниэмикэ хамсааһынын тохтотор, сабан кэбиһэр наадата суох. Онуоха, бастатан туран, ковиды кытары охсуһарга бэлэммит. Иккиһинэн, төрүт сабан кэбиһэр түгэммитигэр, урбаанньыттар, дьоҕус биисинэс, улахан да тэрилтэлэр тулуһар кыахтара суох буолуоҕа.